السبت، فبراير 07، 2009

يبكي الكمان ..

يبكي الكمان ..
كلما افصح عما بخاطره ..
كلما حدث عما صار و كان ..
*****
دموع حبيسة ..
بقيود من هواء .. بلا جدران ..
فقط قيود من هواء ..
ذاك الذي جعل مرآها مسموحاً ..
فصار لها قيداً !!
و عتاب ..
عتاب مع ابتسامة لوم .. أشد قسوة من عبوس !!
حيث عتاب الحبيب ..
بلا غضب ..
فقط ابتسامة ..
و نظرات ..
******
( دو .. ري .. مي .. )
هكذا يدّعون انها تقول ..
تلك الاوتار الحزينة ..
و هم لا يعلمون كم من الحكايا تحكي ..
و كم من الهموم تشكي ..
و تبكي ....
******
نظرات ..
نظرات بلا كلمات..
و لكن هيهات !!
في دنيا بلا أبصار تعي ..
أن يجدي عتاب البسمات ..
امممممممم ..

أ لهذا إذاً يبكي الكمان ؟؟؟

براحتك !!

مجموعة عوالم غريبة !! كل واحد مننا بيدور في فلك صغير بتاعه مكون من آماله و أفكاره و أسراره و توافه اموره !
و عيون كتير ..
شوية بيبصوا عليه .. و شوية بيعرفو يبصوا جواه .. و شوية بيبص بيهم على الدنيا مع عنيه ..
ساعات بنفكر نحلل كل حتة – بل كل فتفوتة في العالم دة ونستمتع بفكرة ان احنا الى مكونين كل جزء فيه ..
كل شوية نشيل حاجة ..نغير مكان حاجة .. نحط فازة .. دبدوبة .. نعلق بورتريه أو صورة بالزيت ..
يمكن نضطر نشيل حاجة عزيزة علينا عشان مخبية وراها حاجات أحلى .. أو نضطر نحط حاجة مش عاجبانا ( عندي قناعة شخصية ان في اوضة كل واحد في حاجة غايظاه و سايبها مش عارفة ليه !! دور كدة هتلاقيها ..) ساعات بسبب .. او حتى بدون ..
وساعات مابنحاولش نتفرج على العالم دة او نفكر فيه على انه بتاعنا اصلا !! يمكن مش لاقيين لافكارنا مكان فيه من كتر الزحمة !! مش قادرين نعمل فيه الى احنا عاوزينه .. فمطنشينه !!
بس دة ميمنعش انه موجود يافندم .. و حتى لو مش عارفين نعدل فيه على أرض الواقع..استاذ خيال متبرع بالمساعدة المجانية طوال ايام الاسبوع..ماعدا ايام الخنقة الزيادة و زحمة الشغل و قلق الامتحانات .. الكشف ( لمة حلوة و خروجة في مكان مفتوح )والاستشارة مجانية ..
بص على العالم بتاعك بقى كدة ..
شايف الكركبة الى هناك دي و مدايقاك ؟؟ شكلها كدة من النوع الى حتى عمر بحاله ميكفيش توضبها فيه !!
و لا يهمك ..
اسرح شوية .. اعمل تكوينات مفرحة من الاشكال الى جوة الكركبة .. طيارات ورق و ست عنيها طيبة بتدحكلك و كتكوت صغنن ( ابو دحكة جنان ) باصص على حاجة عادية كئنها اختراع !!
مش شايفهم ؟؟
طب اسرح تاني كدة ..
يمكن تشوف بيت من نور و ايادي كتير عاوزة تاخد بايدك و تطبطب عليك بس يمكن من كترهم شكلهم عامل زي ما يكون كركبة !!
مش شايف بردو ؟؟
امممممممم ..
شكلها كدة كركبة من النوع المفتخر ..
أقولك فكرة أحسن ؟؟
هات فازة كبييييييرة مليانة ورد أحمر و أبيض .. و دبدوب ناعم عنيه فيها حب قد الحب الي بتشوفه في عنين اكتر حد بترتاحله في الدنيا ..
حطهم قدام الكركبة و انسى ان انت الى حاططهم ..
دة مش دحك على الدئون لا سمح الله !!
هما كدة كدة كانوا موجودين .. انت بس عملت تجديد .. غيرت مكانهم .. حطيتهم في حتة احلى بكتير ..
أصل العالم دة بتاعك ..
من الآخر يعنى ..
( بـــراحتــــــك ... )

إهداء ..

إلى كل من أشعرني يوما ما أني أستطيع الكتابة ..
( بحاول اثبتلكوا انكو غلطانين .. عند بقى !! )