الجمعة، أبريل 23، 2010

حنـــين ...



بقت بتجيلي حالات غريبة من الحنين ..

حنين لأشخاص غرب عني ،، أو علاقتي بيهم سطحية جدا و بعيدة ،، أعرفهم من مدة قصيرة أو معرفهومش خالص .. زي ما وديع سعادة بيقول " يبدون رقيقين من بعيد " و أنا مفتقدة الرقة اليومين دول بشكل موجع جدا بالنسبة لشخصية تشبهني ..

الغريب بسيط ،، مفيش سابق " أي حاجة " يحسسني بقلق أو خوف من ناحيته أو يخلق توقعات تصيب أو تخيب .. رد الفعل تجاه أي حاجة معمولة بهدف الفرح هيبقى الفرح فعلا ،، القلوب متفقة اتفاق ضمني ان مفيش حسابات .. حسابات على ايه ؟ هو مفيش حاجة أصلا :) ..التفاصيل الصغيرة و الكبيرة هتبقى مؤثرة ة من غير مقارنات بحاجة عدت و حاجة جاية ... احتياج مشترك هتبقى نتيجته رضا عند كل الأطراف و ارتياح ... احتياج انساني بحت لحالة تعاطف و وجود .. مجرد حالة وجود ...

بساطة إنك تفرح حد متعرفوش قد إيه مريحة .. ممكن يحط راسه على المخدة مبتسم في نهاية يومه لمجرد إنك حسسته بدفا الترحاب أو الحرص على القرب ... لمجرد إنك عاوزه هنا .. أكتر من انك عاوزه ،، محتاجله .. و وجوده يفرق و حريص إنك تقوله دة ،، في حين احتياجك لوجود ناس كتير قريبين منك أوي ممكن تحس بيه حمل عليهم و عليك انت شخصيا ... بتحاول متحسسهومش بيه ،، و كرامتك توجعك أوي لو بان ،، خصوصا لو كان باين و بدون رد فعل على قد لهفتك و اندفاعك .. و تبتدي التعقيدات و الحواجز اللي مابتنتهيش

النهاردة بالذات كان حنين غريب لأبعد صورة ممكنة ،، كنت راكبة ميكروباص و ورايا اتنين بيتكلمو عن رضوى عاشور و أحلام مستغانمي و محفوظ .. حاجة مابتحصلش كتير في الميكروباصات دي ،، واضح انهم مروحين من وسط البلد و أكيد كانو في ندوة ... كانو عسولين أوي و بيتكلمو باستغراق تام و بيحكو ،، حسيت بانتماء غريب ليهم ! كنت قاعدة مبتسمة و أنا بسمعهم و هما ورايا و لا حتى شفت أشباههم ايه .. و كانت جوايا رغبة حقيقية اني أفضل معاهم ! أستخبى وسط الكتب اللي في ايديهم اللي قاعدين بيقلبو فيها باهتمام حقيقي دي و أروح معاهم مطرح ماهما رايحين .. يمكن رايحين يقعدو على قهوة يكملوا كلام .. و هيتكلمو و يتبسطو اني سامعاهم ،، اهتمام البنت بردو بيبقى ليه مذاق تاني و لو أخت أو صديقة ، يمكن حد يتأثر أوي فأطبطب عليه و أحس قد ايه طبطبتي لامساه ... كان محتاجها بجد و عنيه كلها امتنان على المبادرة ... هو محتاجها و أنا محتاجة أديهاله ،، و احنا الاتنين نتدارى في الموقف البسيط دة من هم كبير ، هم الانتظار أو الوحدة أو خيبة الأمل أو .. أو .. أو ،، أي حجة خايبة لتبرير ألم سببه في الأصل حالة احتياج بسيط لشوية طبطبة ..

آآآآه مكملتش ،،

صحابي الاتنين اللى انا معرفهومش دول و لا أعرف شكلهم هيبقى نفسهم يسمعوني بقى ... و أنا قال يعني أعمل نفسي مش عاوزة أحكي ،، و أحس قد ايه البوح عزيز وأستمتع باللهفة على المشاركة ... اللهفة دي اللي بتدوب في دوامة التعود و بتوحشنا أوي ،، بلاش الجمع.. بتوحشنـــي أنا أوي ،، و بتبقى منورة في وش حد أول مرة يسمعك ..

يمكن بعد مايسمعوني مايفهمونيش أوي ،، اللي أكيد انهم هيتعاطفوا تماما لرغبتي في الفضفضة مع أي حد ،، حد احتمال يكون شبهي من بعيد بدون أي سابق معرفة ،، إلا شوية تلميع أكر ،، على نقاش عن رضوى عاشور و أحلام مستغانمي و محفوظ ...


أنا نزلت من الميكروباص قبليهم ،، مش عارفة دي تهيؤات و لا حد فيهم فعلا كانت عينيه معايا و أنا بعدي الشارع بعد مانزلت ... كئنه بيطمن عليا ،، كنت حاسة بعينيه اللى متابعاني من غير مابصله .. و لا لمحت شكلهم خالص و مليش نفس أتخيله ...

بفكر بس لو كانت جتلي فرصة أكلمهم كان ممكن أقولهم ايه .. امممم يمكن أقولهم متعقدوش الفرح ! و خلوا بالكو من آفة الاحتياج و صعوبة الاحتواء ،، ماتستسهلوش !! علاقاتنا بالناس تستاهل التعب ... صعب أوي حد يحس إنك مستسهل غيابه .. صعــــب ،،



و آآآه اقروا كم بدت السماء قريبة بتاعت بتول الخضيري :)) ..

و خلي بالكو ،،


مـ

نــ

ي ..



7 التعليقات:

هوبتي يقول...

بجد موضوع رائع جدا واحساس عالي قوي
انا كمان بحس بحنين كتير ,بس بحسه لوطني ولامي الله يرحمها وبحسه لحبيبي لان معظم الوقت يا انا بسافر يا هو بيسافر وممكن نشوف بعض في السنة 4 او 5 مرات بس البركة في النت بقي والتليفونات ههههههههه

وانا بسببك دورت علي بتول الخضيري لاني بصراحة اول مراه اقرا اسمها
وميرسي ليكي
وتقبلي مروري

هدى يقول...

http://www.youtube.com/watch?v=I86sI-Fb3PU

انا خوفي يا حبي

لتكون بعدك حبي

واتهيألي نسيتك وانت مخبى بقلبي

Unknown يقول...

بتحصل
و بتبقى مثيرة للعجب اوي ..
بس حقيقية و صادقة للدرجة الأقصى ..
مشاعرك عجبتني .. جدا.

مروة يقول...
أزال المؤلف هذا التعليق.
مروة يقول...

. صعب أوي حد يحس إنك مستسهل غيابه .. صعــــب ،،

وجعتني قوي يا ريمو، وبيتهيألي إن الأصعب إنك تحس إن اللي بتحبهم مستسهلين غيابك
وماتخافيش اللي يعرفك كويس لازم يأخد باله منك:))

Unknown يقول...

هبة .. ربنا يخلي حنينك دايما فرح ... و يخليلك صاحبنا و يبقى جنبك على طول ;)

منورة .. و مبسوطة اني عرفتك على بتول الخضيري ،، حيث أنني مولعة بها :)

كم بدت السماء قريبة أحلى رواية قريتها من فترة...


هدهود .. تصدقي خفت أفتح الأغنية ؟؟ خايفة تكون بتوجع و أنا موجوعة جاهزة و لله الحمد :)

بس اتبسطت أوي أول ماشفت اسمك

ماتغيبيش ...

شيماء .. أول مرة تنوري هنا مبسوطة بيكي أوي و بحب مدونتك أوي :))..
أدام الله نورك ;)

مروة ... " من غير أستاذة أهو " .. حاسة بالصعوبة دي جدا و بشربها يوميا ع الريق تقريبا ،،

و في ناس تعرفني كويس و مبتاخدش بالها مني تفتكري ليه ؟؟؟ عشان أنا متطلباتية و دلوعة مثلا مثلا ؟؟

:)

غير معرف يقول...

:) مدونة أخرى أضيفها الى قائمة من سأتباع ما يكتبون خلال الشهر القادم ، أما حالة الحنين فهي حالة بالجو نوعا ما ، عندنا بفلسطين بشهر 4 و 5 ونهايات 3 جو الربيع يشيع حالة من البهجة والخصب على كل شيء حتى البشر ، لا أعلم كيف يكون ربيعكم في مصر لكنه غالبا خصب كما هو عندنا :)
تحياتي - وبالمناسبة أنا هنا من باب فضول معرفة أولئك الذين سيجزون أنفسهم في السجن طواعية !