السبت، فبراير 19، 2011

وسط البكا

أنا مش عارفة ممكن أكتب ايه دلوقتي .. الكلام منغمش جدا وسط البكا ، في الغالب الكتابة وسط الشحتفة تشبه الكتابة و انت سكران ... مش عارفة على أساس ايه أنا مسكرتش قبل كدة عشان أقول ! تقريبا هيا دي المشكلة .. أنا بقول .. طول الوقت بقول حاجات كتير .. و كل ماقرر أسكت تماما لأني مليش فيها ألاقي الكلام بيلاحقني تاني ، بس أنا و الله مرهقة .. مرهقة جدا فوق ما يمكن أن يتخيل بشر .. و مش عايزة أتكلم خالص .. و كنت عارفة إن الكلام اللي بيطلع من روح دبلانة كدة عمره مايودي ناحية خضار ...

موجوعة جدا ،، و آسفة جدا .. و فاقدة تماما الرغبة في الحياة

الحياة دي أكبر مني بكتير و أنا مش عارفة أتصرف فيها !

يارب ... الدنيا برد جدا مهما اتغطيت ! البرد بياكل عضمي و ضهري واجعني بجنون .. و روحي استنفذت تماما في الدموع دي كلها .. حاسة إن صوابعي هتتكسر و أنا بكتب .. أنا بتلاشى و لا خلاص اختفيت ؟ " آآآه " دي آهة حقيقية ،، انت حاسس بيا يارب .. انت وحدك حاسس بيا ،، انت خلقت البرد و عارفه أكتر مني و عارف بيعمل ايه في روح مالهاش غير الدفا ... أنا مش بنوح ، أنا أصلا مش غاوية نكد و لا غاوية وجع و لا عايزة أجرح حد ... أنا فيا حاجة غلط ، مش عايزة أفكر فيها كتير .. و لا محتاجة أفكر دلوقتي هنام ازاي و هصحى عينيا عاملة ازاي .. و لا اني تعبانة أوي و لا إني حاسة إن التحاليل هتطلع زي ماهيا و لا إن فكرة إني ممكن أكون جرحته هتقتلني بالبطيء و لا إني بقيت كائن مزعج مش عاجبه العجب و لا إن فيا حاجة غلط ... أنا مش عايزة أفكر .. أنا عايزة مخزون الألم يخلص و ألاقي طريقة منطقية للتعامل مع الهوا اليومين اللي جايين ...

و عايزة أنام يارب .. أنا عايزة أنام
أرجوك !

1 التعليقات:

Unknown يقول...

غريبة ..!!
إزاي بنت جميلة مليئة بالحياة ترفض الحياة ؟؟
إزاي يا حبيبتي ؟؟
يا حبيبتي انظري حولك .. مصر صارت أجمل .. ثقي بالله و بنفسك ..
لاتقلقي على التحاليل .. بإذن الله ستصيرين أفضل .. و هو ولي ذلك و القادر عليه وحده.
ماتقلقيش .. ربنا موجود .
و ان شاء الله مع الوقت الجرح هيتداوى و البرد هيروح .. اطمئني بالله :)