السبت، أبريل 30، 2011

في وسط الزحمة ..





" يوه ،، أنا افتكرتكو صحاب .. أصلي اتصورت كدة لما شفتكو حاضنين بعض في التلج يعني ..."

و آآآه يا غلبان... أنا مقـــدر! ،، مش سهل انك تتنفي .. عندك مثلا ابو رجل مسلوخة اول ماتنفى عمل طقية من ورق شجر بودرة العفريت و لبسها فوق دماغه .. و سمى نفسه المهراشا ... "

و أنا بما إني مقتنعة إن فيا شبه من المنفي الحبوب بتاع شركة المرعبين ... فأقدر أقولك يا ريهام إن أنا كمان مقدرة .. مقدرة كمية الدموع الهايلة اللي هبطت عليكي فجأة :

- ممكن عشان مكنتيش قادرة تقفي بجد النهاردة ، و مع ذلك مشيتي كتير ، كتير أوي ... و الراجل و هو بيستلم منك الحاجة أًصر يعسفك و يخليكي ترجعي تمشي تاني ... و اضطريتي تدمعي شوية و انتي ماشية و حسيتي بغربة من الشارع اللي مش فاهم قسوته ، و أول مالاقيتي محل آيس كريم / منجم دهب .. قلتي بس .. هتحلي الموقف و تجيبي لنفسك هدية ... قمتي اكتشفتي ان آيس كريم بـ 7 جنيه آخر الشهر و انتي معكيش حق المواصلات .. يعتبر في كثير من الثقافات : قلة أدب !

- ممكن عشان دراعاتك الاتنين وارمين و مزرقين في مكان الوريد ، شكلهم محبط جدا .. ممكن عشان بقو بياخدو منك دم مرتين في الاسبوع ... و كل أسبوع 3 حقن علاج بدل ماكانت واحدة .. و بتاع خمس أدوية في اليوم ! و مع ذلك اللي حواليكي لسة مقتنعين ان فيكي حيل يبقى مطلوب منك حاجات ، و مهما عملتي تبقي في الآخر مقصرة ...

- ممكن عشان نفسك في أي حاجة مفاجئة تحصل ، في إنك تحسي ان حد مكلف خاطره و تعبان عشان يفرحك شوية .. و إن فرحتك دي مش مهمتك لوحدك

- ممكن عشان مش لاقية الزرار اللي بندوس عليه فنضعف دلوقتي و نحس دلوقتي ... و ندوس عليه تاني فنتعدل و نبقى جامدين

- ممكن عشان لابسة دلوقتي قميص روز و شعرك مفلفل و عشوائي و لطيف بعد الدش اللي لسة واخداه .. و نفسك حد دلوقتي حالا يشوفك و يقولك إن شكلك عسول كدة ...

- و ممكن عشان محتاجة أوي تنامي نوم هادي و تصحي كويسة .. و مش شايلة هم حاجة ، و مش صعبان عليكي نفسك

و بما إني عارفة كل دة .. فآه يا غلبانة ... أنا مقـــدرة ...

و شايفة بردو انك تعمليلك طقية من ورق شجر بودرة العفريت .. و تلبسيها فوق دماغك.. و تسمي نفسك المهراشا ...






و ممكن بردو تقعدي تصقفي و تقولي : الصلاة ع الزين الصلاة ع الزين


3 التعليقات:

Tota يقول...

انتى احلى انسانة فى الدنيا .. بجد انا بحبك فى الله اوى وكنت اتمنى اخدك فى حضنى جدا دلوقتى واشيل معاكى همك.. يمكن علشان انتى شبهى ( اصل انا اكبر منك سنا )..
ارجوكى حبي ريهام اوى لانها ناقصها جناحين وتبقى ملاك حقيقى عايش وسط البشر
يارب تفرحى وتبقى احسن واحلى واروع كل يوم

روز يقول...

الصلاة على الزين الصلاة على الزين
وكمان: شكلك عسول خالص بالشعر المفلفل، أنا بحب جدا الشعر المفلفل وشايفاه أكثر جمالا من المفرود والناعم والمتسرح
وأنا اكتشتف محل آيس كريم حلو في ميدان الحجاز، أوديكي عنده مرة إن شاء الله :)
...
ح تبقي أفضل إن شاء الله يا ريهام.. معلش

The illusionist يقول...

يبقى نقول الصلاه عالزين الصلاه عالزين اسهل اكيد يعنى
صباحك خير
اول زياره وجت بصدفه غريبه
سالخير