الخميس، سبتمبر 06، 2012

البنت اللي.. مليانة ديفوهات




أصلها بنت عادية جدا..
يعني مثلا هيا مش زي القمر..هيا بحالات، لو رايقة وواكلة كويس " و دة مهم عشان صحتها العقلية" و نايمة كويس ومش شاغلها حاجة .. هتحس ان وشها هادي و أمورة، هيا شخصيا بتبقى حاسة انها أمورة و دة بيفرق..  لكن  لو مش نايمة كويس و مهمومة ،حتى و لو كان الهم دة انها نسيت تشتري رمل القطة، هتحس ان وشها ضلمة و عايز يتغسل!.. بتنقي لبس بيطلع عليها عظيم لو عندها مزاج.. و ساعات بتبقى مبهـــدلةةةة، و نموذج عملي مؤلم للمرأة العاملة المطحونة.. و البنت المصرية المفحوتة.. و كحل سايح بقى و أرايل صغننة طالعة من الايشارب و مقولكش :D

ايديها كبيرة فحت! و الحكاية دي كانت معقداها من زمان، كانت بتتكسف تحط ايديها على خدها في الصور زي ما البنات بتعمل عشان شكل كف ايديها أكبر من وشها! فالنتيجة مش بتطلع  في الصورة انها بنت رقيقة مستنية ابن الحلال، نووو .. تحس ان واحدة بتقولك " آي سي يو مان!" و بتهددك انها هتديك بالبوكس.. دة غير انها شبه ايد ابوها فحت و مش ناعمة يعني، و مش خشنة بردو عشان الظلم وحش.. هيا بس مؤخرا بقت مليانة خرابيش قطة.. و بتبقى ساقعة أوي في الشتا

أما بقى الكوع و الركب و كل الحاجات اللي بيجيبو في الإعلانات بنات منكوشة حزينة بسببها، فحدث و لا حرج.. حضرتك هيا سواقة عجل قديمة.... ايند اوف ستوري!

ساعات كدة بتفكر، ايه اللي يخلي فتى أحلامها" اللي مفيهوش غلطة" يبصلها هيا و يسيب كل المزز التانية "للي مفيهاش بردو غلطة"، ساعات الزقزوقة بتلعب في دماغها و تقولها : فكك من الأحلام و خليكي في الواقع.. قابلي عرسان صالونات و كملي حياتك بقى بدل مانتي واقفة كدة محلك سر!

وبعدين تفكر: يمكن لما يسمعها بتدندن  بروقان و هيا بتعمل صينية مسقعة يمكن تدريسها في تاريخ الحروب ضد التتار، يحس انها بنت مميزة فعلا.. أو يمكن لما يتأكد إنها مش هتكون مهتمة بعد 20 سنة جواز مثلا انهم حققوا ايه و لا ساكنين فين، هيا هتكون مهتمة انها لما تراجع نفسها تلاقي مابينهم في كل يوم لحظة ضحك من القلب.. او انها مبطلتش تكون سبب انه يبتسم، حتى و هيا منكوشة أو عيانة أو قميصها مليان بقع طماطم - ويتش هابنز ألوت- أصلها مبتحبش تطبخ بصلصة خالص

البنت دي تقدس الناس اللي متعشقين في بعض، اللي مستعدين يدعموا بعض خلال كل الهسس و بيحترموا تفاهات بعض لأقصى حد.. وبتشد شعرها بشكل شبه يومي و تتساءل: فين.. فيـــن.. فيــــــــــــــــــن

البنت دي ساعات لما بتبص في المراية و تشوف كل الديفوهات دفعةً واحدة عينيها بتدمع.. و بتشيل هم كل الحاجات العبيطة اللي مش هتهم حد لو حبها بجد.. بس لما تسأل نفسها "على ايه؟" هيحبها على ايه، ممكن تكتئبلها يومين.. بس تفكر انها لازم تركز في موضوع تاني خااالص.. ألا وهو التحويش لسفرية ماليزيا.. أصلها هناك هتشوف الشجرة اللي بتتجمع عليها فراشات النور و تخليها شبه شجرة الكريسماس طول السنة.. الشجرة دي مش موجودة غير في مكانين في العالم، ماليزيا واحد منهم.. و هيا هتروح تشوفها هناك.. برغم انها بتحاول تحوش ألف جنيه على بعضها و مش عارفة.. 

بس هيا هتروح..

عليا الطلاق بالتلاتة لاهي رايحة :D


8 التعليقات:

Unknown يقول...

ربنا هيحققلك احلامك .. انا متأكدة

Zeinab Hataba يقول...

هتروح :)) جميلة اوى

Zeinab Hataba يقول...

هتروح :)) جميلة اوى

Unknown يقول...

ال بيحب حد

بيحبه كده

مش هقولك مش هيبقى شايف الديفوهات

لا بس هوه بيحبه كده

علشان الحب مش شكل وديفوهات

مش بيختار قميص هوه

الحب تلاقى ارواح

Hegazy يقول...

:)
البت دى "عليا الطلاق بالتلاتة" عبقرية :)

عالمى ازرق يقول...

البنت دى جميلة قوى بس هى اللى مش عارفة تقدر نفسها كويس
تعرفى اننا كل ما بنعرف نقدر نفسنا بنخلى كمان الاخرين يعرفوا يقدرونا

وكمان انا واثقة ان البنت دى جميلة وروحها اجمل بكتير وده احلى مافيها

ربنا يحققلك كل احلامك ويسعد قلبك مع الشخص اللى بتحلمى بيه وتفضلى جميلة كده زى ماانتى

radwa adel shedeed يقول...

جامدة أوى
والتفاصيل اللى زى دى هى اللى بتوقفنى وعليا النعمة لتروحى ماليزيا أصلى هاموت واروحها انا كمان

روز يقول...

ولازم تروح :)