الخميس، مارس 21، 2013

لازال هناك سحر في العالم..آه و المصحف



السحر.. تعريف: هو اللحظة الخاصة اللي حظك الحلو و عنايتك الإلهية يخلوك تلقطها فجأة كدة، فتحس إنك لسة قادر تستمتع بإنسانيتك وسط الهراء و العبث اللانهائي دة كله، تخيّل؟! آه و المصحف..

لازال هناك سحر في هذا العالم.. صدقني


 يعني مثلا، لسة لما بتقطم فص البرتقان بؤك بيتملي عصير حقيقي- مش المعلّب الهفأ دة- ..وكل ما سنانك تضغط على الحبيبات الهشة اللي جوة الفص بتاخد رشة جديدة من العصير، زي مفاجئة مبتخلصش على مرة واحدة و مش دايما متوقّعة.. مفاجئة جاية عشان تبرّدلك سقف حلقك انت بالذات و تنزل تغسل صدرك من كل الأحاسيس البايتة و الخمول و ترجعه صدر عيل صغير، و اللطيف انك تقدر تستناها بمجرد ماتقرر تاكل برتقاناية.. و في نفس اللحظة، شكل الحبيبات دي  وهيا مرصوصة جنب بعضها كدة جوة الهلال البرتقاني دة، لو ركزت هتلاقيها لوحة فنية و الله و مبهجة جدا.. مش هينفع تصوّرها، ودة من أهم مصادر السحر بردو.. إن في حاجات  ماينفعش تتلقط غير بيك، عمرها ماينفع تتسجل بالكلام و لا تتصور بكاميرا.. لازم تتشاف بعينك انت.. زي مثلا مراقبتك لعود القرفة الخشب جوة عصير التفاح السخن بيفضّي حمولته من شوية القرفة اللي جوة، دة حدث سحري جدا على فكرة.. الموضوع بيبتدي بإنك تكتشف ان العود دة فيه مسام صغيرة جدا بتعمل فقاقيع هوا ضئيلة جدا جوة العصير و دة معناه ان المية السخنة بتتسرب دلوقتي حالا لجوة جلد عود القرفة بشكل تاني انت مش شايفه.. بتدوّبه من تحت الجلد، علاقة حب دي و الله.. و لما شوية النسيج البني ينزاح و يظهرلك و يبتدي طعم السيدر يختلف فعلا بتحس معاهم بالخلاص و الاكتمال.. العود بيبقى متشبع و ريحة المزيج بتبقى عبقرية.. ظبّط قعدتك و استمتع لوحدك بلحظة سحرية متخصش أي حد تاني

فيه سحر في المية  الدافية اللي بتنزل عند رقبتك و تطبطب على كتفك و انت بتاخد دوش، و تستخبى كدة في فجوات عضم الكتفين و جوة ودانك فيبقى صوتك عظيم و انت بتدندن عك السنوات :D .. تتحضن م المية و تخش تكمل حضن نفسك في السرير و تنام.. مين يقدر يحرمك من دة؟.. فيه سحر في الهوا الساقع و هو بيخبط في وشك و يزغزغ ورا ودانك بردو-كلهم مستقصدين ودانك- و يدمّع عينيك، يشيل الكتمة و يملاك حياة.. فيه سحر في الطبيخ، في تتبيل الأكل بالذات، إحساسك بالتوابل متنطورة على كف ايدك زي رمل بحري مندّي بتغوص كفك جواه و جوة الأكل اللي بيتملي سحر قدامك في التو و اللحظة و يتحول من حتة لحمة لاحتفالية، الطماطم بطراوتها و ريحتها و عمايلها مع أي نوع أكل.. البصل و ريحة الغنا و لا الصيت بقى.. الأغاني العجيبة اللي بتفتكرها وانت بتتبل الأكل بالذات.. امبارح مثلا مش عارفة ايه اللي فكرني بـ "بتحبها ولا بتفكرك بيا"، انا مكونتش اعرف اني حافظة الأغنية دي أصلا :D... فيه سحر في المزيكا اللي بتتظبط على مقاس المود و الله ماتعرف ازاي! في الأفلام اللي مبتبطلش تكلمك كدة.. في الكتب اللي بتحكيلك حواديت، و في الكلام اللي ربنا بيجريه على لسانك فينور جواك انت لمبة سهاري كنت محتاجها.. حاجة كدة منه فيه يعني عجَب والله :D


فيه سحر في عينين الاتنين صحابي اللي حضرت فرحهم و حسيت بفرحتهم إنهم أخيرا هيتلموا في بيت، كانوا واحشين بعض جدا! :).. فيه سحر في البنت صاحبتي "الزهرة" اللي عايشة في مكان بعيد أوي في آخر مصر تقريبا و برغم كدة بتاخد بالها مننا كلنا، تطمن ع الجميع و توزع أمومتها كل ليلة و تتابع أخبارنا بدقة و تسأل لو غبنا، و بتحسب إن دة عادي تخيلوا؟!.. فيه سحر تاني في البنت صاحبتي التانية " الرزة" الصغننة اللي قررت تبعت برقية لحسن مصطفى في السجن المشدد بتقول" خلينا نستفسر عن أول الفراشات، عن أوراق الينابيع.. خلينا لما نضيع مننتهيش فجأة"... و كانت  مستغربة ان الراجل اللي شغال في البريد تنّح و بتحكي القصة عادي... و بتنشر عنوان سجنه للناس عشان كلهم يبعتوله شعر و يملوا سجنه حياة.. فيه بالذمة سحر أكتر من كدة؟!

   فيه سحر في وش البنت اللي شفتها و انا بتمشى، ايديها متجبسة -تقريبا من مظاهرات- و خارجة من مقر حزب التجمع تبص للشارع بإضاءته الهادية و تقول للناس بوشها "حاسين؟ فاهمين أنا قصدي ايه؟!".. وشها كان حزين، بس مين قال ان الفرح احتكر السحر لوحده؟ السحر متنطور يا جدعان والله حتى في وجع البطن! في ألم بيحسسك بضعفك و غلبك.. فيه سحر في احتياجك لجلد هذا الآدمي دون غيره اللي يخلي صوابعك تتسرسب من وراك لوحدها عشان تلمس وشه فتحاول تلمها و تلم نفسك و تتنهد.. فيه سحر في الشقاوة :)) ، في قطتي و فروها و لحس الصوابع القططي بوله شديد و احنا صاحيين من النوم و لسة نعسانين..  في كوباية آيس كريم الشيكولاتة البيضا اللي هيا طعام أهل الجنة كما قال أحدهم ع الفيس :D في التطبيق العملي لـ "وحدي لكن ونسان و ماشي كدة"، و في الافتقاد الهادي لسندة كتفك و انا ماشية.. مش الفقد المؤلم، تؤتؤ.. دول شوية شوق انا عارفة انهم هيتعوضوا فأسمحلهم يلازموني و خلاص.. فيه سحر في فزعة عمر ابن اختي من نوم عميق أول مايسمع صوتي واللهفة اللي بيتلفت بيها عشان يتأكد انه أنا و ياخد حضن، فيه سحر في مشهد رقصك مع عمر ابن اخوك على اغنية "واد يا نصة :D" اللي وصفتهولي و من ساعتها بتخيله كتير و بضحك.. فيه سحر ان ابن اختي و ابن اخوك يبقى اسمهم عمر أساسا :)) فيه سحر ف إني اقولك اني عاوزة أكتب عن السحر، فكر معايا كدة؟ فتقعد تقوللي حاجات كتير مفادها إنك شايفني مصدر السحر في حياتك.. فيه سحر في إن ربنا يزرع رؤيتك للسحر فيا، مهو كل واحد فينا مليان سحر و محدش بيشوفه.. فيه سحر مستخبي في رقبة بجعة كريستال صغيّرة جوة كيس قطيفة كحلي اديتهالي على غفلة واحنا ماشيين في الشارع، فيه سحر في شكلك و انت مكسوف وانت بتديهالي و مش عارف تبصلي، نفس السحر على عتبة محل الراجل اللي جبنا من عنده سندويتشات بعدها و قعد يرخم ع الستات ولما انا اعترضت قالنا  أنا بهزر دة النقار هو أحلى مافي الجواز أصلا، و لما دعينا ميحرموش من مراته قال من قلبه آمين..

فيه سحر في الخطوط البيضا اللي بتجري ورا بعضها ع الأسفلت في الشارع، بتجري و تبعد و تاخد معاها كتير.. براقبها من شباك التاكسي اللي هيوديني الشغل اللي هيخلص بسرعة بسرعة عشان أمشي و اروح اشوفك، و افتكر ان ربنا قرر يغمرني بالسحر كدة أول ماتبصلي وانا جاية ناحيتك، و تشيل السماعات من ودانك و تبتسم... :)
 

10 التعليقات:

Hegazy Saad يقول...

السحر لسه موجود.. وهيفضل موجود، الدنيا لسه حلوة ف البرد، وأم كلثوم كمان ممكن نشوفها هولوجرام ونحضرلها حفلة جديدة.. لسه الدنيا كبيرة أكبر م تخن دبدوب الحضن، وأحلى م البجعة الكريستال.. لسه القشعريرة اللي بتتجمع ف ضهر الواحد لما يمسك إيد اللي بيحبه موجودة. وده على فكرة من أعظم أنواع السحر
لسه انتي موجودة.. لسه كتابتك بتسحرنى ولسه تفاصيلك بتاخدنى.. لسه لما تيجي سيرة "آ نوصة.. آض آ نصة.. آسّي فو سي مي ماطا وحياة والدك" بتضحكك.. :)

شيماء علي يقول...

خليكي حاسة بالسحر.. :)
افرحي.. انتي تستاهلي تفرحي كتير.. أوي.

نورهان محمد يقول...

جميل اوى ، حنتعلم السحر منك :))

hanan khorshid يقول...

يا ربى مانا من بدرى عمالة اقول ان فى حاجة :)
ربنا يسدك دايما ياقلبى وكل ايامك تبقى سحر

علا يقول...

ريهام .. أنتى رائعة رائعة رائعة بكل المقاييس

متمكنة جداً من اللغة

خيالك مبهر ..

أعجبنى و بشدة :)

كنت عايزة أقولك فكرة ... لكى كامل الحرة فى القبول أو الرفض

موضوع السحر كان ملهم جدا بالنسبالى ..

بفكر لو تتقبلى فكرة إنى أستعير العنوان و أجاريكى فى مقال ليّا .. على أن أشير إلى مدونتك كمصدر الوحى و الفكرة بالتأكيد :)

فى إنتظار ردك :)

علا يقول...

و فى كل الأحوال .. شكراً جزيلا :)

Don Kejota يقول...

ولسه في حد بيكتب بالجمال ده

reham يقول...

اتفضلي يا علا طبعا :))

و موتشكرة جدا يا ولاد.. منورين :)

Zeinab Hataba يقول...

فى سحر ان حد بيستمتع بسحر الحاجات البسيطة اللى انا برضو بستمتع بيها :D
ممكن بقه تشاركينى طريقة عمل عصير التفاح بالقرفة علشان معرفهاش وعاوزة اجرب سحرها :)

غير معرف يقول...

مبروك الكتاب ياريهام انا فرحانه ليكى وبيكى اوى يارب دايما حاجاتك البسيطة تسعدك