اعتذار ..

عارفة لما سمعت صوتك النهاردة حصللي ايه ؟

فضلت آخد نفسي و أقشعر .. و آخد نفسي تاني !! وأغمض عنيا في حضن من غير كفوف ،، و عنيا دمعت دمعتين نفسي أعيطهم في حضن حد بحبه من مدة و مش عارفة ...

قلبي ارتجف من غير مبرر ...

يمكن حنين لحالة طبطبة مرتبطة بيكي لمجرد ما أسمع حسّـك ! حالة محتاجاها الساعة 4 و تلت الفجر ،، تصدقي حاجة توجع أوي إنك تحتاجي حضن الساعة 4 و تلت الفجر ؟؟؟ .. تفتكري هعمل ايه ؟!
يا إما أطلع أجري في الشارع لحد ماوصل لأقرب حد بحب حضنه ،، يا إما تهمسيلي بشوية كلام حنين و أحضن أنا نفسي و أنام ...

انتي و الأباجورة و السقف و شوية كلام هادي ،،
" وبيسكت طبعا عشان مابقاش ناكرة جميل " ،،

( وَنــَـس )
مابحسش بيه و لو وسط ميت بني آدم ،، بكفوف أبرد من صوتك بكتير ...

متاخديش على خاطرك مني ،
اكمني يعني بقالي مدة مش بسمعك .. و مقضياها خبط و رزع و وجع دماغ ، يمكن بهرب من الشجن اللي في حضن صوتك ، ساعات مابستحملوش .. بهرب بالدوشة من روحي اللي بتشفّني زيادة لما أغوص في الشجن ،، بقيت بخاف منه عليا .. على قد مابيعرف يحسسني إني حية ، على قد مابيقدر يفتتني ..

ناوية أأنكجك في أي تمشية اليومين اللى جايين :)
و أحكيلك تاني ،، فاتك من حكاوية كتير .. و عدت عليا ليالي فكر مشاورتكيش فيها ، و هنا حب مارويتلكيش عنه ..

و انتي ترجعي تحكيلي ،،
عن " القمرة اما طلعت عالشجرة " و " برج الحمام المسور و عالي .. " و اللي " كتبو أساميهن عالباب ،، على كتب الدمع و راحو ... "

اتفقنا ؟؟

مستنية الحواديت ...
و سماح بقى المرة دي :)