عاوزة لمعة منورة تخطف عنيا في وسط الزحمة فأتلهي ! و مفكرش في يوم صعب مجهد ،، فتفت فرحة بزرع فيها بقالى جمعة ...
المرض سخيف و أناني ... بيلملم كل حاجة في غطاه ،، يغطيك انت بالكآبة و يقف يبص و يطلعلك لسانه ،، خصوصا لو انت اللي بتقوم بدور المتفرج ... متفرج بيجري ورا مسرح متحرك عشان يتفرج على عرض وحــش هو أساسا مش معزوم عليه ! و لا عارف يبقى ليه فيه دور ... يعرف واحد كومبارس معرفة سطحية من بعيد ،،، و عمال يجري ورا المسرح عشان يلحق يسلم عليه ،، جواه خوف .. مش فاهم هو خوف لا مايلحقش ،، و لا خوف لا صاحبه اللي من بعيد مايفتكرهوش ... و كلهم يتلموا عليه في الآخر و يقولوله : ايه اللي جابك هنا !!
مشهد غريب أوي ... و سخيف
طيب ...
محتاجة محاولة جادة إني ماكتبش حاجة حزايني ! أنا أصلا محتاجة أفوق ....
لمعة منورة .. كنت بقول عاوزة لمعة منورة ،،،
زي السما مثلا ،، لما تكون بيضا وانت جواك مغيم ... تخليك تبتسم و تكتم العياط ،،، و كل ما جواك يغيم تبيض أكتر ... و تكتم العياط أكتر ... العياط المكتوم بيقف عادة في مناخيري !! آه و الله ... أول ماشم شوية هوا أحس اني في أزمة ،، الهوا بيزغزغ مخزون العياط المكتوم و احتمال كبير أعيط من غير سبب !! .. فأقول خلاص يا بت .. ماتتنفسيش ... أحسن تعيطي و يقولو عليكي عبيطة ... و في الغالب محدش مقتنع ان شكلك أمور و انتي بتعيطي غيرك انتي ... هيقولو عليكي عبيطة !! ماتتنفسيش ،، ماتتنفسيش فاهمة ؟؟؟ .....
يووووووه بتقلب حزايني بردو ....
تاني ... نقول من تاني ...
اللمعة المنورة .. آآآه مالها بقى ؟؟؟
كنت بفكر في يوم كنت محتاجة أقعد على الكرسي الهزاز في بيتنا على حجر حد ... أومال ؟ أهز أنا الكرسي ؟؟؟ لأ أنا عاوزة حضن " تفعيص" يحاوطني أوي و حد هو اللي يحرك رجليه عشان الكرسي يتحرك و أتمرجح أنا .... و أتفرج على الشارع من فوووق .... و أشوف العربيات اللي ماشية كور نور بتجري ورا بعض محطوطة هنا عشان تزينلي الشارع و بس ،،، و البيوت مزروعة جوة الشجر مش العكس ،، و الحياة أبسط كتير من نفس واحد بقلب موجوع ...
يوميها كنت بفكر في القلق ،،القلق اللي لما بعرف أتخلص منه ببقى أسعد مخلوقات الكون تقريبا ،، يمكن السحابة و الموجة هما اللي أسعد مني بس ....
لو فكرنا كويس هنلاقي ان احنا طول الوقت بنفكر في حاجة واحدة بس بصور مختلفة ... احتمالية اننا نتنكد ! كل الحاجات بتصب في خوفنا من الاحتمال دة .. كل الأفكااار و الهم و وجع القلب ... عشان خايفين نتنكد ،، كنت حاسة ان أنا عبيطة ... يعني أتنكد و أنا بتنكد و أتنكد و أنا لسة بفكر اني يمكن أتنكد !! ايه النكد دة كله ؟؟ هيا مرة واحدة و السلام ..... يارب الهمني أتنكد في ميعاد النكد و بس !
اممممممم ايه علاقة النور بالنكد ؟ ... هيا علاقة طز بصباح الخير بالظبط :)
نــــــــور ... كنت بقول عاوزة لمحة نـــــــــور .... ماتجمعي شوية يا بنتي !
..
آآه افتكرت ...
.
" أنا عاوزك متخافيش ... شكلك بيبقى حلو أوي و انتي مطمنة ... "
تتقال لي و انا بتمشى على الكورنيش في حضن كبير ... أخش جواه ألاقي باب مكتوب عليه " هم ريهام " .. دة معمول عشان خاطري مخصوووص !! هييييه ... هفتحه ،،، و أفتح جوايا وصلة نور تسحب كل شحنة الهم السلبية جدا و ترميها في آخر الأوضة .... هقفل الباب أوووي و أضحك على منظر اليافطة ... " هم ريهام " .. مش جوة ريهام !!
طب تمام ...
مازال إذا على هذه الأرض ما يستحق الـــ .....
:)
0 التعليقات:
إرسال تعليق