الأحد، يونيو 20، 2010

نقـــاهة .. " 3 -3 "




3- هيـــلا هـــــوب :



أجـــري !

كنت مستنية إني أتأكد إني رجعت أنا لما ألاقيني بعرف أجري .. أجري من غير ماحس بأكياس رمل مربوطة بفيونكة بيضا في كعوبي ،، هو صحيح الرمل بيفكرني بالبحر اللي واحشني .. و الفيونكات البيضا رااائعة ،، بس أنا نفسي أجري !

أجري على طريقتي الخاصة و هي ببساطة شديدة شوية تنطيط على طراطيف الصوابع ... مبحبش أجري و كعب رجلي على الأرض أبدا ،، الجري بالطريقة دي بيفقد ميزة احتمالية الطيران ،، اللي هيا طبعا أحلى حاجة في الجري ..

طول عمري بتبسط جدا بفكرة إني خفيفة ،، بعرف أتسلق كدة و أطلع و أنزل بسهولة من على الحاجات ،، أقعد مربعة على الكرسي الهزاز و يفضل هزاز :) ،، أجري بسرعة و خفة ،، عشان كدة موضوع الجري دة كان مأثر في نفساويتي بصراحة ،، أول مرة تليفوني رن و هو بعيد شوية و معرفتش أتنطط على طراطيف صوابعي عشان ألحقه .. في حاجة جوايا اتاخدت كدة ! و استخبت في ركنة بعيدة عن القلب و الرئة و كل الحاجات اللي تعبت دي أحسن تتعبها زيادة ،، و عيطت شوية .. الحاااجة اللى جوايا هيا اللي عيطت هـه ؟ مش أنا طبعا .. و قعدت أقول لنفسي بقى بلاش افترااا احنا كنا عارفين نقوم أصلا ؟؟ ،، و الإنسان نمرود و بتاع ... و مسكت نفسي بهدلتها حبة كتيرة كدة :)

بعديها بمدة كانت أول مرة أعدي الشارع لوحدي تقريبا ،، و أبقى محتاجة أمد شوية أحسن العربية المستعجلة اللي وراها الدنيا كلها و أنا بس اللي قدامها ،، تاكــلني مم .. حاولت أجري نص جرياية كدة ،، كعب رجلي كان ع الأرض تمام .. و كنت بنهج و لا كئني طالعة من الماراثون ! ،، و برغم كدة كنت حاسة بالإنجاز و اتبسطت شوية صغننين ..

النهاردة جريت مسافة لا تقل عن بتاع 15 -20 بلاطاية كدة في بيتنا عشان ألحق أرد على بابا في التليفون ... كان واحشني الطيـــرااان .. واحشني فعلا


...
تصدقو إني بقالي كتير أوي بكتب عن العيــا ؟؟

التجربة كانت تستحق مني فعلا كل التدوين دة .. بفكر كتير إني هيجيلي يوم و أقرا التدوينات دي و أقعد أحمد ربنا كتيــــر إني بخير ،، بحمده من دلوقتي و الله ... أما الصحة دي طلعت حتة نعمة !! حاجة كدة و لا غلاوة أول مطرة بتنزل أول ماييجي الشتــا ..




شهر كامل عـــدى ،، ممكن في نهايته عشان أحاول أوصفه .. أتسحّب بشويش كدة على قصيدة بحبها لـ " منذر مصري " و أنقل كام بيت منها قادرين يوصفوا أحسن مني :


..



" ظــلٌ على عيـْـنيـْن ،، ليستــا لأحد


...


صفير مركبٍ يبحر


نظرة بحــَار ..


زيارة نــورسٍ


لمنـــارة ..."

:)

4 التعليقات:

Lobna Ahmed Nour يقول...

عارفة .. البيزنس بتاع الأدوية والعقاقير هيكسب كتير اوي لو عمل كبسولات ريهام لعلاج الاكتئاب بجميع درجاته

قلبي بيفرح قوي لما بيقرالك

يا رب دايما تكوني بخير وتسعدينا بتنطيطك
يا كمنجاية :)

مَلَكة يقول...

مش عارفة انا بس اللي كدة ولا ايه
بس انا لما بقرا لك حاجة خصوصا من ساعة سلسلة النقاهة دي ما بدأت بمر بكل انواع المشاعر خلال النص
فيه اوقات بحس ان قلبي واجعني فعلا.. وبعدها على طول احس اني طايرة معاكي مع انا ما بمشيش غير وكعبي على الارض..

عجبني قوي قوي تعبير"زي غلاوة أول مطرة بتنزل أول الشتا".. حلو قوي بجد.. لدرجة انه يستاهل انه يبقى تشبيه.. يعني بدل ما نقول وغلاوتك يافلان.. نقوله وغلاوتك اللي زي غلاوة اول مطرة في الشتا :)

مش انا شفتك امبارح؟
بس والله وحشتيني :)

خلي بالك من روحك

Unknown يقول...

i just loved that.. i did

Unknown يقول...

يا لبنى انتى أحلى ى ى و الله و مفرحة أوي و كتكوتة و عسولة ... هقعد أدلع فيكي كتير على فكرة :D

ربنا يكرمك يا رافعة معنويااااتي .. بجد كلامك بيفرق معايا أوي ..

تسلميلي


ملوكة ..

وحشتيني أكتر .. يقطعه المشروع على سنين المشروع :(

أنا لو بجد بقدر آخدك معايا و نروح و نيجي و نتنطط و نرجع تاني .. أبقى أسعد الناس :)

دة بس عشان قلبك الحلو اللي بيحس بجد ..

خليكي منورة هنا ..

و هااانت .. اسبوع و هنرجع نتقابل كل يوم ان شاء الله ;)

...

و هيا كمان بتحبك يا صدفة :)