الخميس، يوليو 15، 2010

رايحة بقى .. و خلاص !




أنا رايحة أحقق حلم .. حد عايز حاجة من الحلم ؟؟

لو تحبوا أول ماشوفه أسلملكو عليه ،، أوصيه عليكو شوية و أشكيله شويتين من الزحمة اللى عاملاها " مرارة الانتظار " .. بقيت بلمحها في الشارع و أنا ماشية أكتر من أي حاجة ، قاعدة مربعة كدة و حجمها ضخم جدا لدرجة إني ساعات مبلحقش أتفرج ع الشجر و السما .. و بوصل البيت قبل ماكون خلصت سرحان فيها ...

هقوله : " ازاي نعديـلك .. امتى تحققنا ؟؟ يا تجيلنا يا نجيلك ،، يا حلمنا الحقنــا " .. زي ما حميد الشاعري عمال يقول بقاله سنيـــن ،، و لا حد لحقه و لا حاجة .. بس مش إشكال يعني ، يمكن أنا صوتي أحلى من حميد ،، و بعدين أنا بنوتة و كدة و هيبقى ليا دلال على الحلم بردو :)

رايحة بقى و أمري لله !

و أنا عارفة إن الحلم كريم و مش هيكسفني ،، و هيطلع أحلى من اللى حلمته كمان ... و التفاصيل بتاعتي اللي أغلبها مطبوع في عقلي الباطن نتيجة كم الأفلام الأجنبي و العربي و الإيراني كمان! اللي بشوفها ،، على شوية الأغاني و الموسيقى اللى عايشة معاهم .. كلها تفاصيل ساذجة أوي و مضحكة أوي .. و الحلم الي بيتحقق هيبقى ليه تفاصيل تانية أنا معرفهاش ،، و مفيش فيلم و لا أغنية حكولي عنها ... فيلم ايه بس ،، يعني هو المخرج و المونتير و المصور دول واخدين توكيلات الأحلام في الأرض مثلا عشان يحققوهالنا على لوح القزاز اللى مقضيين تلات اربع عمرنا قدامه ؟؟ دول غلااابة ... و نفسهم هما كمان يدوقوا الطعم الحقيقي الحقيقي أبو تفاصيل حقيقية و إحساس حقيقي ،، هما اللي حاسينه فعلا .. مش شخصيات الفيلم اللي محدش حاسس هما في ايه بالضبط غير الورق اللي اتكتبوا عليه ! ...


و بعدين يعني يا عم خوف ... بالنسبة للملل سيادتك ؟؟؟ أنا أصلي بزهق بسرعة .. و هخافلي شوية و بعدين هروح أجري ورا الحلم زي ما العيال بتجري ورا عربيات الرش بالضبط و هجيب لكل اللي يعرفوني العااار .. يرضيك كدة يعني ؟؟

عالعموم ..

اللى عاوز حاجة من الحلم يقول ،، أنا أحب أخدم أوي ..

الحلم خلاص ،،

بقى معرفة ;)

5 التعليقات:

إبـراهيم ... معـايــا يقول...

قـشــطـــة ....

((جااايلك يا حلمي خلاااااص..))
....
ولسـه الأحلام كتييير ... بس انتو تحلمو
...........
وهابي بيرث داي تو يووو ...
و ..
يا نجمة كل ما ضيها يلمس حجر
يعلا ويتحول قمر
.....
وياللا حالاً حالاً بال ..حيو أبو الفاصاااد
ــــــــــــــــ
عاوزك تقولي للحلم .. بطل تهريج :)
عشان أنا سامع عنه سمع خير إنه كتير بيهرج اليومين دول
.
.
ربنا يسعد أيامك.. ويحخقق كل أحلامك

أحمد شريف يقول...

السلام عليكِ


أغلب ما طالعته في تدويناتك مُبهم ويحمل مفردات خاصة

بالتوفيق على كل حال

reham يقول...

ههههههههههه
طب فهمني ايه علاقة أبو الفصاد بالموضوع و أنا أجيبلك بونبوني ..

ربنا يخليك يا ابراهيم :)

و حاااضر هقوله ..



أ أحمد .. مبهم من أنهي ناحية يعني ؟ :)

ياريت توضيح ..

و عالعموم منور ..

محمود(باحث عن حب) يقول...

السلام عليكم
الاحلام ضاعت فى زمن الاهويه
اسلوب كلام رائع انك تخاطبى الحلم والخوف كمان
وكمان المستقبل فى هدايا الوحده محمد خير اللى على اليمين وانتىداخلى المدونه
قلبك ابيض
ربنا يحافظ عليكى
يارب
ويحقق ليكى كل احلامك

youssef يقول...

يعني هو المخرج و المونتير و المصور دول واخدين توكيلات الأحلام في الأرض مثلا عشان يحققوهالنا على لوح القزاز اللى مقضيين تلات اربع عمرنا قدامه ؟؟ دول غلااابة ... و نفسهم هما كمان يدوقوا الطعم الحقيقي الحقيقي أبو تفاصيل حقيقية و إحساس حقيقي


طريقة تعبيرك جميلة .. عجبني اوي اشارتك للافلام و ازاي بنشوف فيها احلامنا ساعات او ان صناعها أحيانا بيحققوا بيها احلامهم اللي ما شافتش ارض الواقع الحقيقي ..
جميل الحلم .. بس المهم نعرف هنعمل ايه عشان ننزله الأرض مش نعيشه في الخيال زي افلام السيما و بس

تحياتي