الخميس، أكتوبر 21، 2010

الحلوة اتكلمت .. :)




هو المفروض إني كنت هكتب تدوينة تانية خالص خااالص مالص و أكيد بالص ،، بس معاكسات القدر ماشية معانا خطوة بخطوة ...

فؤاد المهندس بعد طول انتظار ، لسع ياعيني و قعد يتنطط و يقول : أيها النـــااااس .. المكنةةةة طلعت قمـــــااااش ... الحلوة اتكلمت :) ،، و أنا بقولها من بعديه .. يااااه المكنة طلعت قماش والله يا اخوانننننا .. و أخيرا .. أخيرا هشتغل .. من عشر دقايق بالضبط جتلي مكالمة الهاتف إياها اللي بتقول إني اتعينت ..

المهم إني في هذه اللحظة اللي بكتب فيها التدوينة بردو محبطة و متنكدة .. أنا عارفة إن الميول الاكتئابية عندي كـ "بوني آدم" حادة شوية ،، بس أنا خلاص برأت نفسي من الذنب بتاع " نكدية " دة .. أنا بقى عندي يقين إن حواليا كميات مهولة من الطاقات السلبية ،، تكئب أتخن تخين !

الشغلانة جت واسطة تبع عمي و أنا فعلا بقالي شهرين بدور و موصلتش لحاجة ، تم تعييني بالفعل في شغلانة معيدة في التجمع الخامس بمرتب 900 جنيه ناقص أجرة الباص و الضرايب و البلاوي السودا يبقو بتاع 750 جنيه !! فمارحتش .. غير كدة الناس تبتسم ف وشي ابتسامة لطيفة من بتوع فوت علينا بكرة ،، و شكرا على كدة ..

المهم إن عمي دة ذل اللي جابوني :) و معاه السي في بتاعي بقاله 3 شهور و سقنا عليه خلق ربنا كلهم تقريبا .. و بعد إلحاحا و إصرارا أهو جاب الشغلانة .. و للأسف بابا قرر يديني التليفون عشان أشكره .. فسمعتلي كلمتين من نوعية أديكي دورتي برة و شفتي ... بيعلموني الأدب :) و إنه معملش بالسي في بتاعي حاجة " ملهوش لازمة " و الراجل أصلا مشافهوش .. و بابا استكمل الكلمتين عشان يبقو أربع كلمات و ضيع فرحتي تماما ،، هو اتبسط جدا و قاعد بيصفر في الحمام أهو و هو بيحلق دقنه .. و دي حاااجة تسعدني و الله كفاية إنه فرحان كدة عشاني ،، بس أنا ببساطة اتنكدت.. مش زعلانة منه طبعا بس خلاص نسيت الشغلانة و الفرحة و كل حاجة و مش عارفة أفكر غير في فكرة واحدة : أنا عايزة أعيش لوحدي !


السعادة بالنسبة لي بقت تخيل المكان دة اللي يخصني لوحدي حيث أعرف أحضن نفسي تمام و أطبطب على كل اللي يخصني و ميخصش حد .. بتخيل كل التفاصيل من أول شكل الأباجورة لحد لون الستاير .. و هبتدي بإيه و هجيب إيه قبل إيه عشان المصاريف ! .. بتخيل بردو هوزع وقتي إزاي عشان أروح عند بابا أطبخ و أوضب البيت و كل الحاجات منا أكيد مش هسيبه كدة .. بس المهم إني هروح في الآخر بيتي ،، اللي يخصني ،، اللي أقدر أستقبل فيه الأخبار الحلوة و تفضل حلوة !

النهاردة بطوله أصلا كان حالة طبطبة لانهائية للتخلص من أثر مشاكل امبارح .. و آدينا رجعنا تاني م الأول .. لازم أشوف هطبطب تاني إزاي عشان أبقى كويسة بكرة و بعده ..

في الغالب هروح أمسية حد يقرالي فيها كلمتين حلوين فيهم رسالة مستخبية هحاول أدور عليها ،، يمكن أروح مسرح العرايس كمان و أتفرح على " حولوم " و هو صغنون و بيتنطط و هو بيغني :) .. وأكيد هجيب آيس كريم

..

مِـسا الــفُل .. :)

5 التعليقات:

الست فرويد يقول...

مبروك يا ريهام

ربنا يا يفرح قلبك يارب

ويبعد عنك كل الطاقات السلبية ان شاء الله :)

عمرو يقول...

أهلا ريهام
دي أول زيارة باعملها لمدونتك وإن شاء الله ما تكونش الاخيرة.

ألف مبروك, أنا بقى اللي كدر فرحتي بشغلك هو إنها جات بالواسطة, كنت هافرح لك قوي لو إنها جات بناء على تدوير شخصي منك. مع ذلك فلا أشك في إني لو عندي عمو بيجيب وظايف تفرح فانا أول واحد هاروحله.

ألف مبروك مرة كمان, يا رب يطلع الشغل اللي تلاقي فيه نفسك.

زهرة يقول...

متزعليش نفسك ولا تقللى فرحتك
موضوع الطبطبه ده كلنا بنحتاجه من وقت للتانى مهما كانت ظروفنالان فى حاجات يمكن محدش يقدر يحس بيها غيرنا
........ومبروك على الشغل
بكره تقولى ياريت اللى جرا ماكان
ههههههههههه

غير معرف يقول...

سيبك إنتي . .
أهم حاجة إنك هتشتغلي . . .
ربنا يسعد أيامك . . وييسر لك كل عسير

قهوة بالفانيليا - شيماء علي يقول...

ألف مبروك الوظيفة الجديدة يا ريهام :)
أهم حاجة انك تثبتي نفسك فيها بس و بعدين يا ستي ابقي شوفي هتعملي ايه :)
و مع الوقت و الخبرة صدقيني .. السي في بتاعتك هتكبر و هتبقي مطلوبة أكتر ..:)
ربنا يوفقك يا حبيبتي .