السبت، أكتوبر 30، 2010

زحــمـــة ..




امممم .. يا إلهي!!

دماغي عاملة زي ماتكون صفحة فيس بوك كبيرة فيها لينك ضخم .. كل ماتفتحته ياخدك على لينك .. ثم على لينك .. ثم على آخر .. و في الآخر مش هتوصل لأيتها حاجة ..

زحمــــة .. موووولد و صاحبه غايب على رأي عدوية بيك .. يبدو أنها عدوى الشوارع القاهرية بنت اللذين .. و خلية تنظيم المرور هنا فوق ماتتخيرش عن عمنا الشاويش اللي بيقبض "الجزية" عشان يزود كوارث الزحمة أكتر ...

كرسي الليزي بوي اللي نفسي فيه .. و سجادة حلوة في أوضتي الجديدة ،، و فازات قزاز يكون لونها أورانج ... امممم و بورد الصور اللي هعمله بإيدي و هنقي الصور اللي عاوزة أبعترها عليه .. و أباجورة قزاز معشق أو خوص .. أما مجلة ناشيونال جرافيكس ترافلر اللي خلت جنونة السفر ترجع تلاحقني بقوة فمش قادرة أوصف مشاعري ناحيتها ... مش متخيلة هحس بإيه أول ماوصل مكان مفيش أي حد يعرفني فيه و فيه كمية لا بأس بها من الأزرق و الأخضر ... متهيألي أول حاجة هعملها إني هقلع الجزمة و أمشي حافية على أرض برودتها رطبة و مريحة ،، و هبقى محتاجة حضن كبير ..

البيت ،، الشغل اللي قلقانة منه عشان مش شبهي أوي ... الأجازة اللي هتبقى جمعة بس و أنا اللي هختار كدة بكامل قواي العقلية .. الكتاب اللي نفسي أترجمه و مش هعرف أروح المركز القومي للترجمة عشان مواعيد الشغل !! بس هخلي البنت " دوددة " توديهولي .. أنا عاوزة أكلمها أقولها توديه ... اللي هو طلب التقديم لمشروع الترجمة حضرتك .. أنا أصلا عاوزة أكلم حد أشتغل معاه ترجمة فريلنس عشان أنا بحب الترجمة ... و عاوزة أكتب .. و عاوزة أقرا كتير أوي .. لسة مخلصتش " زوربا " و " أعراس آمنة " و مختارات من الأدب الإيطالي و عاوزة أصمم أغلفة ،، أصل أنا بحب تصميم الأغلفة كمان والمفروض أعمل حاجات بحبها جنب الشغل عشان متخنقش منه و أسيبه !... و عاوزة أروح أقعد ع النيل لوحدي و عاوزة أعيط كتـــير .. و في كذا حد أعرفهم ع الفيس بوك نفسي تاخدني الجلالة مرة و أتشجع و أبعت أقولهم أنا عاوزة أقابلكو !! نفسي أشوفهم فعلا .. و حاسة إني لو شفتهم هنقعد قعدة دافية و نتكلم عن حاجات مفيهاش تنشنة و نبتسم تلاتين مرة في الدقيقة .. أصل بابا كل مايفتح معايا موضوع يقلب بتنشنة .. تصدقوا حطيت الغسيل في الغسالة امبارح ؟؟ يقوم بابا يتضايق إني بكوم الغسيل ! هو أنا لحقت ؟؟؟ و لا حتى شكرني إني دعكت الحمام و جبتله مشاية بلاستيك من مصروفي الخاص ... المشكلة إني مش عارفة إزاي أقنعه إني باخد الدوا ،، و الله العظيم باخده !! دة بقى بيشتكي للناس مني عشان مباخدش الدوا !!! و أنا أصلا باخده !!! أنا عاوزة أقابل ناس أقعد أتكلم معاهم عن حاجات غير الدوا و الغسيل و البيت ... عاوزة ناس أبيض من ناحيتي خالص أشخبط جواهم براحتي ... و أحضنهم بعد كدة قوي فالشخبطة تبهت على هدومي ... و نصبح جميعا سعداء ...

الوحشة الوحشة .. الوحشة .. و أحضان كتيرة أوي مش عارفة بتاعت مين .. و سرحان كتير في السما و جري مستمر من غير تعب ... لأ كدابة ! متعب .. و كل مرة بفتكر إني هعرف أجري من غير ماتعب و دي مش سذاجة ،، دة استهبال ... و أنا مش مصرة أستهبل ،، الفكرة كلها إني أصلا بحب الجري ..

طول الإسبوع اللي فات الفكرة المسيطرة عليا كانت إني ألاقي واحد طول بعرض بارتفاع مستنيني تحت بعد الشغل عشان يشيلني هيلا هوب لحد أقرب كرسيين فاضيين في أي حاجة بتمشي بسرعة عشان تروح البيت .. كنت بحس إني هشة لدرجة إنه محتاج يبذل مجهود عشان متكسرش في إيده .. و إنه يستحمل فكرة إني ممكن أعيط لمجرد إن الجو مش حلو و الدنيا زحمة أوي و ملوثة أوي .. و أنام على كتفه لحد مانوصل يقوم شايلني هيلا هوب لحد السرير و يمسح على شعري بهدوء لحد مانام .. تفتكروا ممكن يعملوا خدمة زي دي ؟؟ طبطبة دليفري .. أو طبطبة بالكهربا .. إيد تتحطلها فيشا فتقوم بجميع أنواع الطبطبة .. بس هتبقى رخمة عشان لو هنجت هتبتدي تلطش بقى و ممكن تتعملق و تسيطر ع البيت ... و لا دي كانت حلقة من توم و جيري باين و لا ايه ؟؟

موووولد و صاحبه غايب ..

أما الآن .. هلحق أتفرج على فيلم the sea inside قبل مانام عشان أصحى .. و أجري بضمير :)

4 التعليقات:

غير معرف يقول...

حلووووووووووووووووة قووووووي الزحمة ديه

حسستني ب900 حاجة ورايا برضه عايزة أعملهم :):):)
هبة صلاح

shymaa يقول...

:)

dandana يقول...

انا بيضا من ناحيتك خالص

وغير كدا..لكل اللى فى البوست..إبتسامة كبيرة
وطبطبة

إبـراهيم ... يقول...

ياااااه يا ريهام، حزن وشجن ودموع وهزار في الآخر ...
فكرتيني بالتدوين أيام زمااان!
وبعدين أصلاً أصلاً حسستيني إنك بتكتبي عني، رغم إني ما افتكرش عمري كتبت بهذه التفاصيل في تدويني!

هيا الدنيا زحمة أي نعم
والزحمة رحمــة :) .. وحاجات تـانية حلوة كتييييير
.
.
ربنا يسعد أيامك
وتلاقي جرندايزر، اللي غالبًا بدل ما هيستناكي بعد الشغل، هيشتغل هوا بقى، ويسيبك تنعمي .. بقربه!