الاثنين، نوفمبر 29، 2010

إحســاس ..




يشبه الرغبة ف حضن كبير ملوش سبب .. يشبه إنك تشوف حد مرة ، مرة واحدة بس .. فتحس ناحيته بانتماء أو أمومة أو حاجة تشبه السكينة ... وصوت يصرخ جواك إنك لازم تاخده معاك البيت و انت مروّح لاازم!! أومال هتعيش ازاي من غير كل الخير اللي ف عينيه دة؟ ايه اللي يخليك تستغنى عن السكن و احتمالات لا نهائية للفرح.. عشان فكرة مستهلكة بتقول إنك لازم تروّح !

مش لازم .. مش لازم تروّح على فكرة .. المرواح دة بقى موضة قديمة .. يعني هيحصل ايه لو نمت على رصيف واسع و فضلت مبحلق في السما و قعدت تقول كل اللي جواك كلــه كـــلــــه للآآآآخر اللي عمرك ماوصلتله .. هتروح بعديها في النوم اللي بنسمع عنه في الكتب ... مش الحاجة التانية دي اللي تشبهله و بنحاول نعملها كل يوم .. احنا يا جماعة مابننامش !

تخيل .. لو حد واحد بس قدرت فعلا تمارس معاه كل جنونك ... حد واحد بس تقوله كل حاجة من غير قلق في لحظتها ، في أوان ما روحك تنطق بيها جواك .. كله كله مش هتسيب و لا نفتوتة .. مش هتبحلق ف وشه من غير ماتقوله إنك مذهول إنه شبهك أوي كدة و إنك مش عارف تتخلص من خيالات لمسك لوشه بإيديك .. و لا هتخبي عليه إنك نفسك تحضنه أوي و تفضل تحكي تحكي لحد ما نفسك ما يروح ،، و لا إن إيديه فيها حاجة غريبة مابين الطيبة و القلق و لا إنك محتاجله و لا إنك خايف منه و خايف من فكرة القرب ...

تخيل ..

بس انت مش هتعمل كدة ..

فيفضل يجيلك إحساس .. إحساس كدة يشبه الرغبة ف حضن كبير ملهوش سبب .. أو إنك تشوف حد مرة واحدة بس فيوحشك أوي ، و تحس إنك تايه من غيره

فتخش تنام !

6 التعليقات:

قهوة بالفانيليا - شيماء علي يقول...

ريهام ..
الإحساس دة عمري ما حسيت بيه ..
جايز لأني خايفة طول الوقت .. !!
و جايز لأني مش بدي فرصة لنفسي تحس بالأمان في عيون حد ماعرفهوش ..
بس كلامك حلو .. شوقتيني أحسه

Anwar .. يقول...

!!!!!!!!!!!!!!!!!!!!!!

الله .. :)

Rana يقول...

:)

الله

ريهام يقول...

ياة احساس جميل جدا عمر محد هيحس حلاوته الا اللى حسه وعارفو احساس حسيته بس معرفتش احققه واعملهبس عينى كانت بتقوله احساس مفيش اى حاجة تقدر توصفه هو احساس بيفضل جواك لان عمر مفى كلام يقدر يوصفه
بجد انتى جامدة اووى والكلام حلو اوى

Omnia يقول...

أنا كمان نفسي..
وفيها أيه فعلا..
ننام على الرصيف
نفسي :))

رائعة بكل التفاصيل وفرحاااانة بجد أني قريت الكلام ده بذات..في التوقيت ده بذات..بالإحساس ده ..بذات :))

reham يقول...

شيمو يا شيمو ..

أنا كمان خايفة طول الوقت ... خايفة أسيب نفسي للإحساس بس مش خايفة أحس ...

استمتعي بالاحساس على قد مقاسه ، و ربنا موكّل ملايكة تحمينا :))

أنا مبسوطة إنك هنا .. منورة


أنور .. أنا بحب مدونتك على فكرة و مبسوووطة إنك هنا ...

و " الله " دي أحلى حاجة اتقالتلي على أي حاجة كتبتها .. تسلم :)

رنون .. الله عليكو انتو .. ربنا يكرمكو بأحاسيس أحلى و أحلى

منوراني يا ست البنات

امممم مش عارفة ليه يا " ريهام " متخيلة إن اسمك مش ريهام و إنك حد تاني :)) يمكن من طريقة الكلام ... بس مبسوطة بكلامك و وجودك هنا .. أوي

أمنية .. يا قمرة :)

كلنا نفسنااا ، ماتيجيو نعمل حملة البيات برة البيت و نفضل كلنا نتمشى للصبح ؟؟؟ :))

أنا اللي فرحانة إنك منوراني .. المدونة دي بيتنا و مطرحنا كلنا :))

تسلموا يا جماعة على البهجة دي كلها