الأحد، يناير 06، 2013

و دايما مرات عم متولي تبلغ عنه و تحط المسئولين بين القيل و القال :\



المفروض دلوقتي أكتب اللي حصل السنة اللي فاتت و أودعه بشكل يليق.. يعني بدون استخدام الـ  F وورد و كدة، بغض النظر إنها كانت سنة على بعضها اف وورد آخر حاجة! بس أنا بنت مؤدبة و هكتفي بالعرفان للجميل للسنة على شوية الحاجات الكويسة اللي حصلت..


أصل بصوا متضحكوش على نفسكو.. مهما كانت السنة بنت كلب فانت أكيد ضحكت فيها من قلبك و قعدت مع صحابك و مع نفسك و قريت كتب و دخلت سيما و سمعت مزيكا و رحت حتت بتحبها.. كتبت ستيتس ع الفيس لاقت إقبال محصلش و لقيت اصطباحات حلوة غيرتلك اليوم و سمعت أخبار عن ناس بعيدة و عرفت ناس تانية لا يمكن كنت هتعرفهم لولا سيدك و تاج راسك مارك زوكربيرج.. و لو كنت محظوظ كفاية كمان فأكيد قفصك الصدري اتشق نصين في مرحلة ما من السنة و اتفتح فيه مجرى طولي للهوا عند سماع صوت فلان أو مواجهة ملامحه.. سواء كملت أو مكملتش، انت استمتعت بالإحساس دة بمقدار رزقك منه السنة دي.. شد حيلك السنة الجاية بقى عشان نجيبلك عجلة!


أنا كريهام كانت عندي سنة حافلة آخر تلاتين حاجة.. هحاول أفتكر حاجات مهمة حصلت في السخّان كدة.. بس أصل انا مصابة بداء ذاكرة السمك: هاااااااي أنا دوري، مين حضراتكو؟! :\


أنا فاكرة تراك " تخبط" بتاع تامر أبو غزالة.. دايما لما بسع التراك دة بتخيل نفسي ع البيركشن جنبه ع المسرح مندمجة و بضرب بكفوفي علي الطبول بخفة و دلع، و الدنيا هيا الشابة و أنا الجدع.. كان إحساس عظيم اني أسمع التراك دة لايف في حفلته في مسرح الجنينة.. آه صحيح دة حدث مهم السنة اللي فاتت، حضرت حفلة تامر أبو غزالة و ريم بنا و كذا حفلة أوركسترا و منال محيي الدين و ختمتها بحفلة هاني عادل في الساقية " قلوب و فراشات".. سمعت مزيكا للركب و خدت القطة في حضني و رحت في النوم.. آآآآه القطة، دة أهم حدث في حياتي الفترة اللي فاتت بصفة عامة.. بقى عندي  دكة عقبال عندكو، و عشان تعرفوا ليه دة حدث مهم، فأنا صحيت الصبح لقيتها متكورة في حضني و ساندة على كوعي و بتبصلي عشان أصحى.. هو صحيح لما قمت من النوم و بوظتلها القعدة عضتني و مشيت و ضربتني في رجلي و هيا رايحة تلعب بالكورة و عبرت عن ضيقها بكل الطرق اني نازلة و سايباها، بس ميضرش، على قلبي زي السكر :D

طول منا ماشية في الشارع السنة اللي فاتت دي براقب ستات شايلة حاجات تقيلة لوحدها و بتضايقلهم.. شايلين الحاجات دي ليه و لمين و ليه مفيش حد بيساعدهم.. كلهم شكلهم أمهات وبالتبعية زوجات.. ليه الستات بتتجوز و يفضل ضهرها عريان؟! سألت نفسي السؤال دة طول السنة و ملقيتش إجابة.. بس اتفتح في قفصي الصدري شق صغير في مرحلة ما من السنة و بقيت بنشكح لمجرد سماع صوت فلان أو مواجهة ملامح وشه، و اتمنيته جدا برغم اني كنت حاسة اني ضهري هيفضل معاه عريان، اشطة يعني!  فالتمست للستات دول العذر جدًا..




السنة اللي فاتت رحت الحسين كتير و كلت كب كيك كذا مرة.. و ملكة اتخطبت! آه و المصحف :)) يوم خطوبة ملكة اقتنعت ان الواحد ممكن يعيط من الفرحة.. كانت الفكرة نفسها فكسانة بالنسبة لي قبل اليوم دة بالذات، و كنت عمالة أقول لنفسي أكيد عينيا بتدمع من الهوا فاكس يعني... بس صراحة ربونا و انا في السكة للبيت افتكرت وشها و عيطت تاني جوة الميكروباص و الشباك مقفول.. فكدة فاكس فعلًا :D

 


السنة اللي فاتت رحت سبيكترا و مكاني و صوفي و بيتزا و كلت حواوشي من عند شلبي.. و بقيت مدمنة بيج تيستي من عند ماك بشكل أكثر قوة.. و جاتو سواريه من عند مايسترو.. السنة اللي فاتت خسرت صاحبة و كسبت صاحبة و عرفت ان ربنا بياخد بإيدك في كل اتجاه لحد ماتلاقي روحك في حتة.. و انه بيطبطب و يسمع..
 


السنة اللي فات جوز اختي راح لربنا، و شفت حاجات غريبة أوي في إطار هذا الحدث و متهيألي حكيت عنها هنا كتير.. بس الأغرب و الأكثر دهشة كان مراقبتي لعمر ابن اختي بيكبر من سن شهرين، وإني أعرف بقى ع اللي بيحصل مع الأطفال في الكواليس عشان تطلعلك ننة جميلة كدة تلعب بيها في المواصلات، حضرتك فيه واحدة بتتسحل ليل نهار من أجل هذا الهدف..




السنة اللي فاتت كتبت كتير و قريت حبة صغننين، و اتعرفت على نيدهي، الرسامة الهايلة اللي بترسم لوح البنت السمرا اللي بحطها دايما هنا.. السنة اللي فاتت اتبعتتلي منكو أحلى رسايل تواصل في العالم و أنقذتوني من الاكتئاب كذا مرة.. و أنا كنت قليلة الزوق فحت و مبردش ع التعليقات هنا بس و الله أنا مليش في جو تسلميلي يا كوكي، شكرا يا بوكي، منورة يا لولي :D بس لازم تبقوا عارفين اني بسعد سعادة غامرة بأي كومنت.. و التدوينة اللي من غير تعليقات بتجيبلي إحباط فشيخ! 

و ربنا يخليكو ليا يا كوكي بوكي لولي :D


هابي نيو ييييييير عم متولي

9 التعليقات:

بِنت نُكتة يقول...

ربنا يسعدك ديما يا ريهام
ويقربك ليه كمان وكمان

بس العنوان بجد ههههههههههههههههههه
مالهوش علاقة بالتدوينة

Lobna Ahmed Nour يقول...

قريت التدوينة من الآخر للأول
ممتعة :))

"ليه الستات بتتجوز و يفضل ضهرها عريان؟! سألت نفسي السؤال دة طول السنة و ملقيتش إجابة.. بس اتفتح في قفصي الصدري شق صغير في مرحلة ما من السنة و بقيت بنشكح لمجرد سماع صوت فلان أو مواجهة ملامح وشه، و اتمنيته جدا برغم اني كنت حاسة اني ضهري هيفضل معاه عريان، اشطة يعني! فالتمست للستات دول العذر جدًا.."

Unknown يقول...

مجتش هنا من زمان انا

الفضل ف لبنى احمد ..نبهتنا ان ف تديونه جديده

------------------

مازلتى قادره ع بث البهجه ف تديوناتك ..

لمستى كام حاجه ف تدوينتك زى

الجزء بتاع

مهما كانت السنة بنت كلب فانت أكيد ضحكت فيها من قلبك
--------------
و اتمنيته جدا برغم اني كنت حاسة اني ضهري هيفضل معاه عريان،
------------
عرفت ان ربنا بياخد بإيدك في كل اتجاه لحد ماتلاقي روحك في حتة.. و انه بيطبطب و يسمع..
-------------
اللي بيحصل مع الأطفال في الكواليس عشان تطلعلك ننة جميلة كدة تلعب بيها في المواصلات، حضرتك فيه واحدة بتتسحل ليل نهار من أجل هذا الهدف..
----------------

شكرا ..وكل سنه وانت طيبه

ahmed nabil يقول...

مذهلة

Hegazy Saad يقول...

استمتعت بالشعور ده علي قد مقدارك فيه السنة دي


وسلامي للحاج متولي ومراته اللي بتحط المسؤولين بين القيل والقال.. فتيجي واحدة تكتب الكلامالحلو ده :)

Rana يقول...

أنا خلصت التدوينة و رشا رزق بتقول "يمكن فيه طريقة جديدة نحنا مش شايفينا"

وده لايق على مود السنة اللي فاتت بالنسبة لي، بسطني إني مريت بتجارب قريبة من بتاعتك جدا.. لسة مندهشة إننا ماتقابلناش حتى الآن، أنا بقول نحاول ^_^

"و لو كنت محظوظ كفاية كمان فأكيد قفصك الصدري اتشق نصين في مرحلة ما من السنة و اتفتح فيه مجرى طولي للهوا عند سماع صوت فلان أو مواجهة ملامحه.. سواء كملت أو مكملتش، انت استمتعت بالإحساس ده بمقدار رزقك منه السنة دي.. شد حيلك السنة الجاية بقى عشان نجيبلك عجلة!"

أنا هشد حيلي عشان آخد عربية :D

Unknown يقول...

"ليه الستات بتتجوز و يفضل ضهرها عريان؟! ليه !!!
حلوه أوي يا ريهام

Bnafsageya يقول...

:D اتبسطت اما دوّرت على نيدهي دي

Unknown يقول...

بظروفها ببحث فى الجوجل عالاغنية دى ملقيتش حد بيتكلم عنها غيرك فاعزرينى لتطفلى واتمتعت اوى بكتباتك وتدويناتك ماشاء الله عموما حبيت اعرفك اسم المطرب عاطف الشادي سنة اولى