مش عارفة ليه ف آخر دقايق من قعدتهم سوا النهاردة : وجيه عزيز و علي سلامة و يسري فودة .. كان وجيه عزيز بيغني " هيلا هيلا " ع العود بإحساس طيب أوي و هما بيردوا وراه .. كنت حاسة إني ربعت جنبهم على مصطبة بعد ما علي سلامة خلص قصيدته " 96 ساعة أجازة .. " اللي كلها خير ، و بعد ما طبطب عليا بصوته بكل القصايد اللي بحبها .. رفعوني من جوة للسما و باسوني على جبيني بهدوء و رجعوني لأوضتي... مجاش في بالي ساعتها إلا لقطة سريعة من بكرة .. و أنا قاعدة جنب بنتي ع الأرض ساندين سوا ع الحيط و بقول لها : أنا و أنا قدك كدة اتربيت على صوت وجيه عزيز ، و شعر علي سلامة ..
حسيت بفرحة مختلطة بشوق للحظة دي .. و إني محظوظة إني اكتشفت جزء من تاريخي دلوقتي هفتكره بعدين ..
ساعتها يمكن تكون مجروحة ، و يمكن أقولها إني في ليلة كدة بعد ما اتجرحت أنا كمان .. سمعت توليفة شعر و غنى من وجيه عزيز و علي سلامة نستني تماما الجرح بقية الليلة .. و جبرت جزء من حاجة كانت بتتكسر جوة ..
و إن في حاجة أكبر من كل دة
حاجة جواكي انتي..
مش بتاعت حد
2 التعليقات:
و إن في حاجة أكبر من كل دة
حاجة جواكي انتي..
مش بتاعت حد
:)
حلو اوى يا رومى
انتى علطول فعلا مدهشة
إرسال تعليق