هو عمل ايه ؟؟؟

بفكر في جناني و احلامي و افكاري الغريبة و دواخل و زواريق مشاعري المتاهة الى متوقعة ان ممكن حد يفهمها من غير شرح و يحسها من غير ماتكلم .. ( لا و شوف حكمة ربما يا مؤمن شوف حكمة ربنا !!!!) و يحس انها شبهه كمان ..
طبعا البني آدم دة من غير نقاش تم الدعاء عليه بذمة من احد الوالدين ..
و لقيت دماغي واخداني الى خيالات مستوحاة من افلام عربي قديمة .. على رغبة في الكتابة الساخرة .. على الساعة 4 فجرا .. من الاخر ( تهييييييس )
و سألت السؤال الاكثر منطقية ..
(( هو عمل ايه ؟؟؟ ))
عمل ايه الاستاذ عشان يقوم احد الشخصين المبرمجين عقليا على حبه بالدعاء عليه بهذه الذمة و تكون النتيجة المأساوية هيا .. ( هيهيهيهي ( دحكة كوهين ) .. انااااااااااا.. )
حاجة من تلاتة :
- مامته كانت نايمة الساعة 2 و نص فجرا في مشهد مهيب .. الدفاية محطوطة على الارض و نورها من تحت لفوق مخلي الظلال بتكبر لفوق و مهزوزة و حالتها حالة .. صرصار الليل بيعوي في الخارج .. و الصمت داخل احلامها نتيجة نوم عميق .. و اذ فجاة .. باب الدولاب يزيق يصحيها .. تفتح عنيها المتعبة .. تلاقيلكو مين ؟؟؟ الاستاذ بيمد ايده في شنطة ايدها و في الايد التانية ماسك جوانتي نسي يلبسه عشان البصمات !!! تقوم تجري وراه بالمقشة وكلها اسى على الابن العاق .. تطلق الدعوة اياها في الثلث الاخير من الليل .. و يضيع الولد عشان كرت شحن مصبرش عليه للصبح !!

- الاب الحاني افتكر قبل ما ينام الساعة 2 و نص بردو .. ( كل البلاوي بتحصل الساعة 2 و نص ) انه نسي الموبايل في العربية .. خاف حد يكسر العربية و ياخد الموبايل و العيال ميروحوش الامتحان الصبح و مستقبلهم يضيع فيزعل عليهم فتجيله ذبحة و يموت و اولاده يتيتموا و يتشردوا و امهم تقعد تدعي عليه بعد وفاته لانها قالتله ميت مرة ماينساش الموبايل في العربية ..( ماكانوا خدوا تاكسي و راحوا الامتحان ورحمونا دة ايه الهم دة !!) .. المهم .. ينزل عشان ياخد الموبايل بدل ما يضيع هو و عياله .. خطواته على درجات السلم توحي بالترقب .. صمت رهيب من باب العمارة الى الجراج .. اصوات ضحكات صبيانية تقترب كلما اقترب من العربية .. و اذ فجاة .. يلاقي ابنه مع شلة من عيال الجيران يدخنون الكيلوبترا في عربيته الطاهرة الشريفة .. يفزع للمشهد و يفزعوا للمفاجاة.. و يطلع يجري وراهم بالمقشة و كله اسى على الابن العاق ( مش عارفةالمقشة جت منين الحقيقة !!! ) و يطلق الدعوة اياها في الثلث الاخير من الليل .. و يضيع الولد عشان سيجارة حتى مش مرلبورو !!

- المرة دي الاتنين بقى ..
هو مين بياخد ثانوية عامة ؟؟؟ مش الولاد طبعا دول اباؤهم و امهاتهم .. الاب بيبيع هدومه و احتمال هدوم الجيران كمان عشان يدفع الدروس .. و الام تصاب بانهيار عصبي دوريا و سكر و ضغط ( مينيمام ) و انيميا حادة و سكيزوفرينيا و عته مغولي ( ماكسيمام ) عشان تتابع الولد و دروسه و نفسيته و بطيخته و فلسعته من الدروس و اسافين المدرسين الخ .. الخ .. الخ !!
الاب و الام في انتظار اجمل خبر في الكون .. الابن .. مهندس .. دكتور .. مستشار .. دبلوماسي .. الاب في دماغه ( يااااه عمري ماتمنيت حد يكون احسن مني غيرك .. يارب )
الام في دماغها ( وقعتك سودة لو ابن خالتك دخل كلية احسن منك يا فاضحني .. يارب .. )
و اذ فجاة ..
يصل الولد و على وجهه الخذلان .. بيد مرتعشة يقدم ورقة باهتة شاحبة .. ينافس شحوبها شحوب وجهه .. ينظر فيها الوالدين .. يسود صمت مطبق و ذهول على وجهيهما .. ليجدوا مجموع لا يصلح حتى لمعهد تجفيف الرينجة ( ابو مصاريف ) .. يطلعوا يجروا وراه بالمقشة و كلهم اسى على الابن العاق .. و يطلقوا الدعوة اياها في الثلث الاخير من الليل ( محدش يسال الواد جاب شهادته في الثلث الاخير ازاي .. ) و يضيع الولد عشان يجيب بفلوس الدروس
كوكدور !!!
اهى حاجة من التلات حاجات دى ..
او يعنى ان جيتو للحق ..
احتمال يكون في حاجة رابعة ..

...............

ان حد يكون دعالي انا بدل ما يدعي عليه ..