و ما الدنيا إلا .... !

ايه يا جدعان الحاجات الغريبة دي ..

بقالي يومين بتحصل معايا حاجات عجيبة ،، يعني واضح إنها رسالة بالزوق كدة من الدنيا إني لازم أقتنع إنها مش حلوة أوي و مليانة أسافين و سخافات و حاجات مش مفهومة هدفها الوحيد إنها تحرق دمك و خلاص ،،

هو أنا كنت بقولها بهزار :

" و ما الدنيا إلا إسفين كبير جواه أسافين صغننة كتيرة " ...

بس واضح إنها اتقمصت و قررت تعرفني إن الله حق ! .. حقك علينا يا ست دنيا لو اتقمصتي من الكلمتين البايخين ،، و متركزيش معايا ينوبك ثواب ...

يعني مثلا ،، الواحد يصحى من النوم في أمان الله يلاقي باباه زعلان منه و متضايق عشان مش عارفة مين راح حكاله موقف بالمشقلب تماما و بدون أي سبب مقنع لحكي الموقف أساسا أو حكيه كمان بالمشقلب !! مفيش أي استفادة و الله .. غير إنه شر كدة لوجه الله ... أتصل عشان أصالحه آخد كلمتين في منتهى العجب بردو و أقعد ساعة أعيط و أنا لسة صاحية أصلا و مش مجمعة ،، بس يلا أهو عياط ساعة و لا كل ساعة ...

مثلا بردو،، تلاقي حد ميعرفكش أساسا يتصرف ناحيتك تصرف عدائي كدة مش مفهوم ،، فانت متضايقش لأنك متعرفوش و ميهمكش في حاجة ،، بس خير يعني هيا السكيزوفرينيا بقت زي البرد و الصداع و لا ايه ؟؟ حاسة إني بقيت بمشي كتير متنحة و علامات الاستفهام و التعجب بتطير من فوق دماغي تخبط في السما ،، الاستغراب بردو بيخلق حالة سخيفة أشبه بالضيق ،، يا مصبر يارب

و تلاقي ناس بتضايق من غير سبب ،، وناس تغير معاملتها من غير سبب ... و ناس تختفي و بعدين تظهر فجأة ،، عايشين في دور العو ! و تقعد تراجع في تصرفاتك عشان تفهم و تشك في نفسك !! لا حول و لا قوة إلا بالله على وجع الدماغ ،، الناس كلها بقت عامة زي سلوك الكهربا العريانة مجرد التعدية من جنبها يقلق ،، لو قررت تلمسها كمان تبقى اتجننت رسمي ،، يعني الواحد يسيبلكو البلد و يمشي يعني ولا يعمل ايه ،، بس النيل هيوحشني .. هيا دي المشكلة ،، يا إما أهاجر على السودان بقى و أمري لله ..

الفكرة في ايه بقى ،، إن أنا مازلت مقتنعة تماما إني مردش الإسفين بمثله و إن أنا مستقبل بس للأسافين و الإرسال عندي مقفول لحين إشعار آخر .. ومادام الموضوع زاد لهذا الحد و أنا مازلت فلحوسة و مش عاوزة أشغل الإرسال ،، فلازم أشوفلي طريقة أتعامل بيها مع الحكاية بحياد ،، يعني لا أرد على اللي بيحصل و لا بردو أنكد على نفسي ! ازاااي بقى ماخبيرش ...

هــــــه ،، نقول ايه ...

و ما الدنيا إلااا ... " حاجات كويسة حاجات كويسة حاجات كويسة "

أحسن دة زعلها وحش أوي !