الاثنين، مايو 17، 2010

كلاكيت تاسع مرة !





هو المفروض الواحد يتكسر كام مرة في الشهر ؟؟

أنا أسمع و الله أعلى و أعلم إن الناس تتكسر مرة ،، مرتين .. في العــــمر ... لكن بمعدل تلات – اربع مرات في الشهر ،، كتيــــر في الحقيقة ،، أنا خلااااااص تقريبا بقيت 40 كيلو و قصرت كمان !

ملخص الكام يوم اللي فاتو اللي بوظت فيهم الحملة التدوينية بتاعتي و حتى بطلت أغير ستيت الفيس بوك !! كالتالي :

- عدد 1 شخصية سقطت من نظري جدا و ربنا يعينني و أعرف أبص في وشها
- عدد 1 شخصية عليت في نظري و مضطرة متعاملش معاها للأبد
- عدد 1 شخصية = أنا ،، محتاجة عمرة داخلية بنت ناس و حالة تهييس و طناش متألق و مسـتمر عشان ورايا تسليمات و مشروع تخرج مش هيستناني لحد ماشوف و النبي مين اللي بيقع و مين اللي بيقف و مين اللي مش عارفة ايه !!

و ربنا ع الظالم !
و الفاتحة ع الخاين و ابن الحـــرام


و كان على عيني و الله يا ريهام أسيبك تنهاري و تعيطي و تنعزلي و كدة يعني .. أنا عارفة إن نفسك تعملي دة،، و أنا كمان نفسي أديكي الفرصة تفضي مخزون الألم اللي انتي عارفة كويس انه مش هيفضى .. وإن عنيكي الحلوين دول اللي بقوا واضحين جدا بكل اللي جواهم بعد ما وشك بقى قد اللقمة ... هيتنفخوا و خلاص ،، يمكن ترتاحي شوية بس بردو مش هينفع ،، الانهيار دة رفاهية خاصة بالناس الفاضية ... و احنا مش فاضيين يا جميل ،، ورانا تسليمة سوووقع يوم السبت الجاي .. لو قعدنا نشتغل فيها من دلوقتي يدوووبك نعرف نسلم ،، اجمدي كدة أومااال .. ميجراش حاجة مجتش على دي ،، طنط دنيا أم قلب أسود من قرن الخروب هتسيبنا بعد كدة في حالنا إن شاء الله و الحياة هتبقى بمبي ...

دة حتى الجو حلو النهاردة و فيه هواااا ،، مش مهم تتنفسيه كله ... هنعرف نخبيه لوقت تاني ، و نبقى نقزقز فيه على مهلنا ...

عارفة ؟ انتي جدعة ... و الله جدعة ... و عديتي بحاجات أسخم و أضل سبيلا ،، و فقتي و بقيتي عال العال ... مش محتاجة أفكرك .. اتجدعني بقى انا مليش حد غيرك أتسند عليه !!

هتعدي

هتعدي

هتعدي

...

هتعــــدّي!

5 التعليقات:

Shrouk يقول...

هاتعدي..فعلا هاتعدي

المهم تركزي في التسليمه والمشروع علشان الموقف ده هايعدي والناس دي هاتتنسي بس نجاحك هايعيش معاكي العمر كله..عايزينه تفوق..نثبت بيه لنفسنا قبل كل اللي جرحونا..اننا جامدين..ونستاهل ونفرح بيه كل اللي بيحبونا
وبالنوسبة لطنط دنيا فمش جديد عليها ان قلبها يكون ده لونه...
عارفة..اقولك سر؟!
الدنيا بتتغاظ لما تلاقي سواد قلبها مش عارف يطرطش علي قلبنا..وان قلبنا بيفضل ابيض رغم كل جروحها ومحاولاتها تسويده...غظيها بقي لانها تستاهل..


هاتعدي...اكيد هاتعدي..

إبـراهيم ... يقول...

اسمعي كلام شروق :)
.
.
وبعدين انهاردة عدد 1، وعدد2،

بكرة لســه ياااامااا ...

هنبقى نمسح بالكيلو يا ريهام ...

قلبك .. أبيض :)

Unknown يقول...

تسلميلي يا روقا ،، نبقى نغيظها أما نقوم من السرير بقى ... واضح إن الانهيار " قدر " مش رفاهية و لا حاجة ...

اللي عاوز يسخن أكل مثلا ،، يعمل شوربة .. دماغي موجودة ممكن يديني ميسد :D

إبراهيم ،،
ادعيلي

Lobna Ahmed Nour يقول...

عديتيهم طلعوا تسعة !! ;D
هتعدي هتعدي هتعدي
لما بقرالك بحس بحالة انبساط غريبة حتى وهو الموضوع عن الانكسارات
ربنا يوفقك يا رب
ادعيلي أنا كمان عندي كومة تسليمات الفترة دي

غير معرف يقول...

وعدت :) ؟