Mr. NOBODY

أنا كنت غضبانة اليومين اللي فاتو ... أوي .. بشكل أنا نفسي مكنتش متخيلاه
و مكنتش متخيلة قصاده إني ههدى دلوقتي خالص .. و لا هسامح دلوقتي خالص .. و كنت عمالة أقول لنفسي إن كدة أحسنلي ... طاقة الغضب أرحم كتير من طاقة الوجع ، ع الأقل بتجيب تمرد و تخرج من الحالة أسرع .. بس من جوايا – بيني و بينك يعني - كنت خايفة لاحسن تنجح قصتنا الغريبة في تحويلي لبنت تانية مش شبهي

بس اكتشفت النهاردة إن أنا لسة عبيطة زي منا و الله .. الحمد لله يعني واضح ان مفيش أمل .. و دة على فكرة شيء مريح جدا بالنسبة لي ، حيث إنني مش حمل إني أشيل جوايا نقط سودة من النوع اللي مابيتمحيش .. و أصلا أنا مش عايزة أتغير ..

أصل انا اشتريت النهاردة كتاب حلو بقالي مدة نفسي أشتريه .. قفشت نفسي متلبسة بفكرة واحدة ساعتها : إني نفسي أحكيلك عليه بسرعة كدة قبل مافرحتي بيه تقل .. و أقرالك منه حتة خلتني ابتسمت النهاردة ابتسامة كبيرة بعد وصلة عياط محترمة .. كان هيعجبك على فكرة ، اسمه " مملكة من عصير التفاح " كاتبه واحد اسمه أحمد الفخراني ممكن تقول عنه انه " مبعوت " زي مابتحب تسمي الناس اللي دماغها بتشطح في الخيال .. كتاب ممتع أوي مليان حواديت على مقاس شوية ونس ينفعوا نور وسط ميتين أم الضلمة اللي احنا فيها دلوقتي ...بس أنا مش هسلفهولك عشان انت مبترجعش الكتب :)) ...انسى يا عمرو ..

أنا ممكن أكمل وصلة الاعترافات الليلية دي و أقول إني قفشت نفسي أول امبارح صاحية من النوم بفكر في فكرة لا توحي بالغضب خااالص بردو .. و هي إني عاوزة أجيبلك وردة و كرت فاضي يوم عيد ميلادك اللي جاي و أسيبهوملك على باب البيت .. عيد ميلادك اللي جاي اللي هو بعد 6 شهور !! .. قعدت أتخيلك أول ماتشوفهم مذهول و مش فاهم خصوصا لو لسة صاحي من النوم و خارج عشان تجيب سجاير... بس بعد ماتفوق شوية هتتبسط و هتحكي لأول واحد هيكلمك في التليفون على اللي حصل ... بس ماكنتش عارفة هتخمن ساعتها إنه أنا و لا لأ ...

فضلت أفكر طول الطريق للحمـّام و أول ماغسلت وشي بصيت لنفسي في المراية كدة و تنحت .. وردة مين يا بنتي هو انتي مش كنتي غضبانة باين ؟؟ .. لا حول و لا قوة الا بالله .. العبيط العبيط و لو سابوه يغضب و يزيط

جدير بالذكر إني كان نفسي امبارح بردو أقولك تسمع " أين تنتهي " بتاعت كاميليا جبران اللي حطيتها أغنية المدونة .. بس تسمعها في الهواء الطلق بسماعات في ودانك ، بتجيب انشراحة في الصدر كدة فجائية ... خصوصا لو بصيت و انت بتسمعها ع السما ، و كان الجو حلو ...


و كنت عاوزة أقولك بردو ان النهاردة عيد ميلاد " روجر هارجريفز " .. دة مؤلف كتب أطفال عامل سلسلة كدة بحبها أوي .. كل شخصية فيها ليها اسم يشبه طبعها ،، و شكل مبتكر كدة مناسب لطريقتها في الحياة .. أنا حاطة صورة منهم .. لو دخلت على جوجل هتلاقيهم محتفلين بيه ، و لو دخلت ع الصور هتشوف أشكالهم و هتحس بعالم تاني مليان براءة ، و فيه أقل قدر ممكن من الطلاسم !

كان ممكن أحكيلك كمان عن مظاهرة ماسبيرو النهاردة ، أنا كنت هناك بس عديت بالعافية ... و كان ممكن أحكيلك بردو عن الراجل الغريب بتاع ماسبيرو و الست العجيبة اللي كانت في المينيباص بتشتم أي حد بدون أي سبب و جابت للناس كلها هستيريا ضحك .. بس كفاية رغي لحد كدة .. الرغي تقريبا كان من الحاجات اللي بتزهقك مني في الآخر

القصد يعني ..
إن الغضب مش جايب همه معايا ، راح لحاله خلاص و لسة بشوف دلوقتي هيحل محله ايه

تصبح على خير ..

كان معكم من مدونة على بالي :
Mr. Nobody