الجمعة، أبريل 27، 2012

تدوينة تافهة فحت!


السؤال الوجودي الكبير: هو انا نكدية فعلاً؟ :\
في حاجات صغيرة كتير أوي بتتضايقني.. قربت أصدق ان مصادر الزعل أكتر بكتير من مصار الفرح، و دة بالذات مش حقيقي.. شجر البوانسيانا مالي الشوارع و الكتب الحلوة بتطاردني و بسمع كلام انا محتاجاه بالصدفة و مشغلة دلوقتي أغنية " دور عليه تلقاه " بتاعت شادية اللي اتبعتتلي على ستيتيوس بالصدفة بردو.. و قطة نشوى صاحبتي ولدت 3 قطط صغننة امبارح! هروح ألعب معاهم بكرة و أكتشف مين فيهم قطتي..
يعني مثلاً مثلاً، أنا دلوقتي حالا كنت متضايقة أوي عشان حاسة بسخونية مابتنزلش بقالها يومين.. أكيد الانزيمات عالية! وانا مباخدش الدوا و دة عامل لي عقدة ذنب شنيعة و حالة بشعة من العند بردو.. مش هاخده! مبعرفش أستحمل روتين البلابيع الكتير كذا مرة في اليوم و ياريت بيجيب نتيجة، النتيجة صداع مستمر و غثيان و دوخة، و حاجة كدة يعني ولا ماكون هجيب ننة!
فمتضايقة، متضايقة اني مش عاقلة و باخد الدوا من سكات.. و اني مش متقبلة نتيجة قراري من سكات بردو و بشتكي.. واني مش عارفة استمتع بالجو الحلو .. و متضايقة ان كل دة لن يمنع اني هفضل مصدعة و سخنة بردو
فبقى ايه.. دخلت ع المدونة و قلت ورحمة خالي حسن لانا كاتبة تدوينة.. كنت من بتاع اسبوع بصيت على عدد زوار المدونة، لقيت مجموعهم فوق الستين ألف!! آه و المصحف :D مكنتش مصدقة الرقم في الحقيقة و حسيت احساس لطيف بنجاح نسبي في اي حاجة، ع الاقل في مشاركة الهسس اللي في نفوخي مع الآخرين.. أنا كريهام انبسطت
المبهج أكتر بقى اني دلوقتي ببص لقيتهم واحد و ستين ألف و شوية.. في عين العدو منك له :D هي الفكرة ان أكتر من ألف بوني آدم دخلوا ع المدونة دي الأسبوع اللي فات فعلاً؟ على رأي مامت حزلئوم في أغنية كل البنات بتحبك: " مين مين ودة ودةةةةةةةةة ".. آه البنات اللي في الخلفية دول كلهم يبقو أمه، بس مكررين صوتها يعني
فانبسطت أكتر..  كدة بقى عندي رسمي بيت صغنن ع النت بيزورني الناس فيه طول الوقت و بطبخلهم أكل حلو و اعملهم لاتيه عَجَب و احكيلهم حواديت.. على ما تفرج بقى ويبقى عندي واحد زيه على أرض الواقع، كدة رضا :)
 كل دة عشان أقول ايه :

انا عارفة تماما اني بتضايق كتير أوي.. بتضايق لما حد يتأخر عليا وبحس بالإهمال .. بتضايق  لما اتوه في مكان عارفاه كويس و دة بيحصل كتير أوي.. بتضايق لما اخش آخد دوش و اكسل أسرح شعري فاصحى تاني يوم ألاقيه منكوش أوي  و أفضل أكسل أسرحه أكسل أسرحه.. لحد ماضطر أخش آخد دش تاني مخصوص و انا معايا الفرشة و عمال أتأفأف من النص ساعة السودة اللي هقضيها في فك طلاسم نفوخي\شعري.. بتضايق وانا سخنة ومش حاسة بدماغي، و أنا مرهقة في آخر اليوم.. وأنا جعانة! و أنا خايفة، بتضايق من التلوث و ممكن أقف أعيط منه في الشارع.. وأنا قلقانة من احتمال أهبل في نفوخي يمكن ميحصلش، بتضايق من لعبة الوقت، بكرهها بكل تفاصيلها من أول تنظيم المهام لحد تأثير الملل على كل شيء.. من لعبة العلاقات بكل أنواعها، ميتين أم الحبال ع الشد ع الرخي اللي كل المجتمع بينصحك بيه في كل المواضيع! كل ماحد يتزنق يقوم قايلك تشد شوية و ترخي شوية.. أشد ايه بالظبط يا ابن الهبلة؟.. بتضايق لما اتفهم غلط، و لما اخاف اتفهم غلط.. لما أتنســي،، ان شا الله ف تاج ع الفيس! 
أحيه! أنا بتضايق من حاجات كتير أوي فعلاً.. دة انا كدة و بحاول مفتكرش الباقي!
بس هي الفكرة اني بهدى تماما لو حد حكالي حدوتة -انه السر العظيم-.. أو لو شفت حاجة مفرحة من أي نوع.. أو حد قالي انه افتكرني بأي شكل في وسط اليوم و دة أسعده.. ولما اقعد أراقب الكائنات الحية و اطلع بنتائج عظيمة عن الكون محدش ممكن يستمخ منها غيري..
يعني مثلاً مثلاًأنا مبفهمش النمل بيحب المية بأمارة ايه، هيغرق ابن العبيطة! دايما في كمية نمل عظيمة بتلعب نط مسافات طويلة من حرف الفازة اللي جنب السرير للمية بتاعت الورد.. هيا يا بتلعب يا إما بتنتحر، وارد بردو!..كمية نمل لا بأس بها  بتقعد تتمشى ع الحيط حوالين الدوش.. مبفهمش ايه اللي جابها هنا خالص يعني
الفكرة اني من شوية لقيت نملة متنية تماماو غرقانة في نقطة مية.. هيا حرفيا بتغرق فيها و فطسانة جواها خالص.. أنا بقى ماحبش نظام تعذيب الكائنات دة! لو هتموت تاخد على نفوخها و تموت على طول متقعدش تطلع في الروح ساعتين.. رحت ببساطة خدت شوية مية و قلت هدلقهم عليها عشان تخلص من قوقعة نقطة المية و تغرق في بحر الفناء الواســع " أم القلش.." 
فعملت كدة، النتيجة كانت عجيبة جدا في الحقيقة.. المية اللي دلقتها خلصتها من حبسها جوة نقطة المية و هيا مانجرفتش معاها لأسباب غير معروفة.. وراحت فاردة نفسها و ماشية.. آه و النعمة!
ودة خلاني ابتسمت تاني و فكرت في حاجات كتيــــر :)

9 التعليقات:

شيماء علي يقول...

ألف سلامة عليكي من التعب و الوجع ..
ابقي خدي الدوا يا ريهام و ماتبقيش مهملة .
كلنا بتضايقنا حاجات صغيرة .. بس بتختلف من واحد للتاني ..
هوني على نفسك شوية و فكري بهدوء ..
لازم تتعلمي دة عشان كل ماتكبري الضغط على مخك هيزيد .. غير ان المجتمع بالفعل له ضغوطه أصلاً.

اهتمي بنفسك .. خدي بالك منها.. :)
أنا باحبك .. جدًا بقى :)

ابراهيم رزق يقول...

التفاهة شىء نسبى يختلف من شخص الى اخر

لان اغلب التافهين بتبقى وجهة نظر الطرف الاخر

و ارجع و اقول
لسه الطيور بتفن
والنحليات بتطن
و الطفل ضحكه يرن
مع ان مش كل البشر
فرحانين

تحياتى

لبنى أحمد نور يقول...

أنا بحب البيت ده وصاحبته أوي
:)

Nelly Adel يقول...

مع إحترامى طبعاً واللذى منه
انا بعشق جنانك دة بجد D:

وعلى فكرة بقى عملتلك تاج ومابدرش منك أى رد فعل بتاتا نهائى معرفش ليه !

سلامتك ألف سلامة وإن شاء الله يكون الصداع وارتفاع الحرارة No More ~

روان يقول...

كمية الحاجات اللي بفتكرها وأنا بقرالك مهولة !!
أنا كمان كئيبة هههههه بس دة رسمي فهمي نظمي يعني :D
إنت مش لوحدك علي فكرة
بس الغريب إني باتبسط لما بقرالك علي فكرة :)

روان يقول...
أزال المؤلف هذا التعليق.
د. أديب اللاعب يقول...

كلام مبهج أخيرا بعد كآبة و تشاؤم طاغيين في الكم تدوينة الأخيرة .. يس :)

FarahNoona يقول...

betgeebe menen el sowar el mo3abera de???

hanan khorshid يقول...

رومى حبيبي
حمد لله على سلامة النملة
التدوينة دى فعلااااا جاااااامدة
بس بليز اعملى الى انتى عايزه بس الدوا مش تدوينة او اعتصام او حاجة تطلعى فيها همك
جنبى ده تماما وبعد كدا اعملى اى حاجة تانية انتى عايزاها