الأحد، يونيو 05، 2011

عمر الهرتلة ما كانت حاجة وحشة ...





سخونية .. سخونية .. نَـفسي سخن و حاسة اني تنين .. وشه هادي .. وشه هادي بغباء ! .. ينفع أفضل أبصلك ؟.. الإضاءة زي مابحبها بالضبط .. لونها الأصفر و كميتها و متوزعة ازاي مابين الكل ، أنا خدت الحبة بتوعي و فضلت مبتسمة.. عضلات رجلي واقفة .. آه ! .. مطر ، احتمال ؟؟ احتمال ينزل مطر تاني ... " كلمة كلمة يا حبيبي تـ افهم علـَيْك ".. وشي بينمـّل بشويش : منه لله فيتامين ب12 .. شيكولاتة جيرسي واكلة الجــووووو : بس هيا مش جيرسي هيا سجوتين بيضا و حد جايبهالي هدية ، و أنا حضنته في الشارع مع اني معرفهوش أوي .. أيوة أنا مقصرة ، مقصرة ف حقكو كلكو و ف حقها بالذات و ف حق الورد كمان ، حد عنده مشكلة ؟ .. وجع الأعصاب ينز ينز ، و يتوغل و ينتشر .. كائنات مستفزة ،، ليه في كائنات مستفزة ؟؟؟ محدش يروّحني معيطة .. من فضلكو .. أول ماعنيا تدمّع وقفوا كلام فورا وطلعوا الطراطير و البلالين بتاعت الحفلة المفاجئة اللي هيا سبب كل دة ... و ما الدنيا إلا فيلم هندي كبير ! و أنا مش " محبوبـةةة " و مش " عشيقي ي ى ى " و مش ابراهيم الأبيض ، طب بعمل هنا ايه طيب ؟؟... ليه بطني تكون بايظة ف أكتر يوم محتاجة فيه اسبرسو ماكياتو و اللبن برة ؟؟ ليه ليه ليه ليه ... محرومة م الكافيين لمدة تسع سنين يا هانم .. طب اشمعنا تسعة ؟؟ .. انت بتحبني طيب ؟؟ طب في احتمال تحبني يعني ؟ أومال حلمت بيك امبارح ليه ماسك ايدي أوي و طالع بيا السلم جري !! ليه ضهري يوجعني ف نفس اللحظة اللي يجيلي فيها صداع و أعصاب رجلي تنز تنز ... ليه تتوجع أكتر أما ممكن تتوجع أقل !!

من يوم ماخدت الصابونة حبيتها أوي ... كونسبت الزحلقة بقى مبهر بالنسبة لي .. يوم ماقف عدلة بقى لازم أشتري لنفسي صابونة مخصوص و أرميها تحت كعب رجلي بكل فخر .. و أول ماقع على ضهري أبتسم لمنظر النجفة في هذا الفيو و أستعيذ بالله من شر الفقد ....

سخونية .. سخونية .. تلطيش كلام في النافوخ .. نهجان كتير .. و التليفزيون عالي و الريموت فين ؟؟

فين ياماي .. فيـــن

12 التعليقات:

Lobna Ahmed Nour يقول...

عمر الهرتلة ما كانت حاجة وحشة أبدًا إطلاقًا

Sumaya Rabie يقول...

أنا عمالة أفكر فيكي طول الليل .. ومن ساعة ما صحيت ..
ومش عارفة أوصلك أنا حاسة ناحيتك بايه بظبط .. بس أنا كنت مستنية أقرا حاجة زي ديه ..
وعلى سبيل الهرتلة: ثم أنا أصلا كبير
وعلى سبيل التأكيد .. الهرتلة حلوة آه .. بس للي يفهمها والله

Bent Men ElZman Da !! يقول...

ده اجمد حاجه لما الواحد يهرتل
بتبقى لحظات خارج الحدود :D

دعاء العطار يقول...

بحب الكلام الملخبط اللى ملهوش أى علاقه ببعضه ... لأنه حتى لو هو مش مفهوم فهو محسوس

كفايه ان اللى كاتبه فاهمه

فلتحيا الهرتله (:

sporeforminghuman.. يقول...

ياأهلا يا أهلا...
أنا سعيدة قوي اني لقيت مدونتك..أعتقد اننا سنتفاهم جيدا

المتمردة هبة يقول...

من يوم ماخدت الصابونة حبيتها أوي ... كونسبت الزحلقة بقى مبهر بالنسبة لي .. يوم ماقف عدلة بقى لازم أشتري لنفسي صابونة مخصوص و أرميها تحت كعب رجلي بكل فخر .. و أول ماقع على ضهري أبتسم لمنظر النجفة في هذا الفيو و أستعيذ بالله من شر الفقد ....


حلووووة جدا دى ..:)

المتمردة هبة يقول...

من يوم ماخدت الصابونة حبيتها أوي ... كونسبت الزحلقة بقى مبهر بالنسبة لي .. يوم ماقف عدلة بقى لازم أشتري لنفسي صابونة مخصوص و أرميها تحت كعب رجلي بكل فخر .. و أول ماقع على ضهري أبتسم لمنظر النجفة في هذا الفيو و أستعيذ بالله من شر الفقد ....


حلووووة جدا دى ..:)

Unknown يقول...

يا ستي الهرتلة مش مهم
المهم ان محدش يفهمها :)

مذكرات كشكول المورق يقول...

أنا أهرتل إذاً قد تبين لى أنى إنسان
(^_^)

Unknown يقول...

لبنى .. آه مش كدة و النبي ؟؟ :))

سمية ... على بالي بردو و الله و جبت سيرتك مع البنت رضوى النهاردة .. شرقتيشي الساعة 7 مساءا كدة ؟؟ :))

أنا كويسة على فكرة ,, أنا بمممممب :D

بنت من الزمن دة .. أنا بقول كدة ، بتبقى انطلاقة بنت ناس :))

دعاء ... فيفا هرتلة .. يعيش يعيش

sporefominghuman..دة انتي تنوري .. تابعونا تجدوا ما يسركم .. :))

هبة .. بورك فيكي يا بونيتي دة انتي اللي حلوة :)


شيماء .. لا تصدقي لما بتتفهم كمان بتحلو! تحسي اننا اجتمعنا جميعا على التوهة دي وفاهمينها سوا

مذكرات ... أنا أهرتل إذن أنا تنين :D
..

طب و الله منورين .. طب اشربو حاجة طيب :)

أحمد ع. الحضري يقول...

:) حلوة

Rana يقول...

من يوم ماخدت الصابونة حبيتها أوي ... كونسبت الزحلقة بقى مبهر بالنسبة لي .. يوم ماقف عدلة بقى لازم أشتري لنفسي صابونة مخصوص و أرميها تحت كعب رجلي بكل فخر .. و أول ماقع على ضهري أبتسم لمنظر النجفة في هذا الفيو و أستعيذ بالله من شر الفقد


عثل يا ريهام ^_^